Reportajen Joselina dos Santos
Sekretaria de Estado de Kooperativa (SEKOOP), Elizário Ferreira sei garante serbisu hamutuk ho Ministériu Turizmu Komérsiu no Indústria (MTCI), no Ministériu Agrikultura no Peska (MAP), halo promosaun edukasaun ba povu produtór sira atu bele promove produtu lokál ho kualidade kuantidade no sustentabilidade iha futuru.
Hafoin abertura Sekretaria de Estado Kooperativa (SEKOOP), Elizário Ferreira hateten parte Sekretaria Estadu Kooperativa hamutuk ho Federasaun Hanai Malu, realiza eventu ka feira ida ne’e atu hataan ba vizita husi delegasaun Sekretariadu Sudeste Aziátiku nian, ho objetivu vizita ne’e atu halo levantamentu ba atividade kreatividade populasaun nian.
“Parte Kooperativa organiza ida ne’e atu hatudu ba delegasaun katak, ita preparadu atu tama ba Asia karik ita nia povu movimentu kooperativu preparadu atu oferese sira ninia produtu ba iha Merkadu Asia nian, Oinsá atu bele promove ita nia produtu lokal sira, la’os de’it iha Nivél Nasionál no rejionál maibe promove mos iha nivél Internasionál,” Dehan, Sekretaria de Estado Kooperativa (SECOOP), ba jornalista sira hafoin abertura iha Salaun Federasaun Hanai Malu, Lanud, Bairro Pite, 13/04.
Governante ne’e dehan normalmente iha situasaun hanesan ne’e, husi Parte Sekretaria Estadu Kooperativa nafatin akompaña monitoriza no superviziona, atu kriatividade hotu-hotu bele iha nia kualidade kuantidade no sustentabilidade atu nune’e bele oferese ba merkadu, labele iha tempu espasu ne’ebe mamuk atu nune’e bele asegura sustentavél efisiente no efikaz liu tan.
“Produtu hirak ne’ebe atu lori ba merkadu Asia mak hanesan daudaun, feira ne’e realiza ita hahú haree husi Tais, Homan ho kreativu seluk hanesan mai husi kooperativa Boneka husi Atauro no munisipiu seluk, nune’e mos Ita sei kria tan kooperativa produsaun oinsa atu hatudu katak ita iha produsaun ne’ebe ho kualidade organiku no mos bele oferese mos ba nasaun sira iha nivél Asia,” nia tenik.
Iha Fatin hanesan Vise-Prezidente Konsellu Diretiva CCD-TL, António da Silva Pinto agradese ba Sekretaria Estadu Kooperativa tanba sempre tau preoridade ba iha produtu lokál sira no mos ba kolega difisiensia sira. Tanba Kooperativu Kreditu Diferensia Timor-Leste (CCD-TL), ne’e barak liu envolve ho maluk feto difisiente sira nia produtu lokál husi Munisipiu Lautem.
