Reportazen Zevonia Vieira
Relasiona ho delegasaun husi Timor ne’ebe ba tuir expo Dubai hamutuk 120, ne’ebe arangka iha loron 14 Outubru husi Aero Porto Nicolau Lobato, hamosu problema oituan tanba bainhira to’o iha Aero Porto internasional Kuala Lumpur (KL), imigrasaun Malaysia nian la fo lisensa ba ema nain hotu atu kontinua semo ba dubai, ho razaun la iha dokumentu kompletu.
Tuir informasaun ne’ebe Neon Metin asesu husi fonte kredivel katak pasajeiru nain 7 (nain 3 protokolu husi ministériu balun no nain 4 husi grupu dansarina ne’ebe parte husi ekipa entertainment labele halo viajen hamutuk ho membru governu nain 7 inklui sira seluk tanba dokumentu la kompletu, nune’e imigrasaun la husik sira lao iha loron hanesan.
Iha loron ohin 16 Outubru Neon Metin tenta halo fali konfirmasaun, hodi konfirma konaba ema nain 7 ne’ebe mak tahan hela iha Aero Portu Kuala Lumpur, maibe iha informasaun ikus ohin loron 16 Outubro sira konsege kontinua sira nia viajen ba Dubai.
Neon Metin tenta halo konfirmasaun ho Komisaun Organizador, Manuel Vong via WhatsApp maibe sedauk hetan konfirmasaun husi Manuel Vong.
Liuhusi publikasaun ne’ebe fo sai Hatutan.com katak iha artigu 34 Kona-bá Rega Espesiál Relativa ho Viajen Ofisiál ba Estranjeiru iha númeru 4 hateten, delegasaun ofisial sira labele liu ema na’in-lima ho esepsaun delegasaun sira ne’ebé akompaña Primeiru-Ministru ka delegasaun-sira ne’ebé ba ho ministériu rua no membru Govenru nian rua (As delegações oficiais não podem ter mais de cinco elementos, com exceção das delegações que acompanham o Primeiro Ministro ou no caso de delegações que incluam mais do que um membru do Governo).
Tuir dadus DSA Circular Report Reference:ICSC/CIRC/DSA/525 1/Feb/2019 mensiona katak kada pesoál ne’ebé halo vizita husi Timor Leste ba Saudi Arabia (Dubai) presiza gastu diária ho osan $392.00. Nune’e, bainhira halo soma ba membru Governu na’in hitu estadia iha Dubai hodi asiste no akompaña Expo Dubai tenke gasta $2,744.00 kada ema no total sira na’in hitu sei gasta $19,208.00.
Expo 2020 Dubai nu’udar agenda mundiál nian ne’ebé boot liu depois de Copa Mundial no Olimpiade ne’ebé sei hala’o durante fulan 6 nia laran, hahú husi 20 Outubru to’o 10 Abril 2021.
Expo ba dala-34 ne’e monta iha area estrategia ho metade 438 hectares ne’ebe sei fahe ba zona tolu, mak hanesan mobilidade no sustentabilidade.
