Reportajen Joselina dos Santos
Esperansa Grupu Produtu Lokál sira ba kandidatu Prezidente Repúblika Periódu 2022-2027, tenke konsidera ka tau matan mos ba produtu lokál kiik sira, ne’ebe kreativu, promove ona ho idak-idak nia kreatividade oin-oin hodi oferese ba merkadu nasionál no internasionál, tanba produtu lokál hanesan identidade ka Símbolu Timor-Leste nian, liu husi produsaun ba iha indústria sira, atu hatudu katak Timor-Leste ho nia identidade no Kultura Original ne’ebé mak bele promove iha nivél Nasional lori mos ba iha mundu.
Maria F. A. Perreira nu’udar Prezidente Credito Union (CU), Kooperativa Feto Potensiál hatete, nia Esperansa ba kandidadu Prezidente Repúblika foun katak hare ba iha kontrusaun estadu iha governasaun bele halo mos mudansa ba iha produtiva indústria kriatividade, ne’ebé mak liu husi inan feto sira iha Timor, hakarak produsaun ne’e no mos hakarak halo prosesu ida hodi halo promove iha ita nia rain, liu-liu ba iha nasionál no merkadu international.
“Ha’u iha inisiativa ida ne’ebé mak hanesan feto portensial hakarak harii kooperativa ida ne’e, atu halo promove kreatividade feto liu-liu iha indústria sira ne’ebé mak ami prepara hanesan halo produsaun industria Tais, indústria kakum, asesoria, halo indústria ba produsaun sasán ne’ebé manual transform mos ba modernu nian, atu oinsa ita bele halo mudansa ba dezenvolvimentu liu-liu iha area Ekonomia nian,” Dehan Prezidente Credito Union (CU), Maria F. A. Pereira ba Neon Metin iha Salaun Federasaun Hanai Malu, Lanud, Bairro Pite, 13/04.
Feto Potensiál ne’e esplika tan katak, produtu hirak ne’e promove atu bele lori haforsa ita nia maluk sira liu-liu ba iha sira moris no vida ekonomia ho sustentabilidade nian. Ho motivu ida ne’e mak nia hakarak harii grupu ne’e, tanba iha asuntu ida hakarak mos atu haforsa feto nia talentu sira ne’ebé mak mai ho ida-idak nia kreatividade, liu husi ida ne’e mos sira halo promosaun hodi haforsa mos sira nia Ekonomia ne’ebé mak asesu iha vida família.
Iha fatin hanesan António da Silva Pinto nu’udar Vise-Prezidente Konsellu Diretiva Kooperativu Kredito Difisiensia Timor-Leste (CCD-TL) hatete, nia esperansa ba Kandidatu Prezidente Repúblika foun iha Periódu 2022-2027 bele tau konsiderasaun ba promove produtu lokál sira, tanba produtu orijinál ne’ebé mak Timor-oan sira iha produtu ne’ebe oin-oin iha produtu artesanatu, produtu sira Kona-ba hahan ita nia produtu barak nune’e ami hakarak husu ba Prezidente Repúblika ida ne’ebé mak eleitu iha periodú ida ne’e, tenke tau konsiderasaun atu promove produtu ne’e ba iha esportasaun no importasaun.
“Ha’u rekomenda ba Prezidente Repúblika eleitu foun rekomenda ba governu hodi tau matan ba indústria ki’ik sira liga ho produtu rai laran, atu nune’e bele hasa’e nia kuantidade ho kualidade produtu sira ne’e, oinsa mak ami bele hetan kapasitasaun diak, atu nune’e bele hadi’a ami nia produtu ne’e iha futuru, tanba ami nia produtu ne’e envolve mos maluk defisiensia sira nia produtu lokál,” Dehan Vise-Prezidente Konsellu Diretiva CCD-TL António da Silva Pinto ba Neon Metin.
Lurdes Mendonça Ramos, hanesan Prezidente ba Grupu Kreditu Union (CU) Higmor, hatete, nia Esperansa ba Futuru, rekomenda ba Kandidatu Prezidente sira katak tenke tau prioridade mos ba produtu lokal ne’ebe daudaun ne’e sira promove, tanba grupu feto hakarak promove sira nia produtu lokál iha rai laran no rai liur, tanba ne’e tenke tau atensaun mos ba sira nia produtu lokál hirak ne’e.
