Reportajen David da Costa Gusmao
Pozisaun Diretór Ezekutivu, Centro Dezenvolvimentu Inkluzivu Timor Leste (CDITL), Martinho A.O.Guterres dehan inkluzivu to’o oras ne’e iha Timor-Leste seidauk iha, no mós haree iha asesibilidade ba infraestrutura mós seidauk iha espasu, inklui iha setór sira seluk liga liu ba iha asuntu edukasaun.
“Tanba ita koalia konaba edukasaun iha Timor-Leste ba ema ho defisiénsia nia partisipasaun ba iha setór edukasaun ne’e menus los,” dehan Diretór Ezekutivu CDITL Martinho, bainhira halo Dialogu ho Kandidatu Prezidente da Republika Lú Olo, iha CCD Merkadu Lama, Kuarta 13/04.
Ho ida ne’e oinsa Prezidente Republika ninia polítika ida ne’ebé maka diak hakarak atu promove inkluzivu sosiál.
“Maibe iha ita boot nia mandatu ita boot koalia liu maka promove Inkluzivu sosial mas nia implementasaun lai”, Martinho kritika kandidatu Lú Olo.
Nia salienta sekarik iha eleisaun tuir mai ne’e, re-eleitu fila fali ba Prezidente Republika ba mandatu daruak nian, oinsa atu haree liuliu ba iha programa no orsamentu governu ninia ne’ebe maka aprezenta ba Parlamentu no lori ba Prezidente Repúblika atu promulga.
“Ita boot eleitu ba PR tuir mai, saida maka ita boot atu haree ba iha programa no orsamentu hosi governu ne’ebe parlamentu aprova hodi lori ba ita boot atu haree, Karik ita boot haree orsamentu ne’e sensibel liga ba ema ho difesensia sira,” nia dehan.
Hatan ba iha preokupasaun ne’e, kandidatu Prezidente Repúblika, Dr. Francisco Guterres Lu Olo, dehan bainhira eleitu ba Prezidente Repúblika tuir mai, sei ko’alia ho Parlamentu Nasionál atu haree konaba asuntu ida ne’e, atu nune’e bele kria konvensaun ida ba ema ho defisiénsia, atu nune’e bele dignifika nafatin sira.
“Dala ruma Ita nia alin sira hosi defisiénsia sempre husu serbisu hamutuk ho Parlamentu ratifika konaba konvensaun ho ema difesensia, Hau hanoin ida ne’e asuntu ida ne’e ita sei trata, maibe ida ne kompeténsia Prezidente Parlamentu Nasional nian, atualmente ita haree bele entaun ita ratifika konvensaun ida ba ema ho defisiénsia, atu ita bele dignifika nafatin ho ema ho difesensia sira, atu bele moris hanesan ho sidadaun sira seluk ,hodi asesu ba iha atividade hot-hotu,” nia esplika.
