Home Analisa Kultura Korrupsaun Hamate Povu Nia Mehi

Kultura Korrupsaun Hamate Povu Nia Mehi

251
0
Everd Scor Rider Daniel. [Foto: dokumentu privadu | 02.05.2021]

Hakerek nain Everd Scor Rider Daniel

Korrupsaun sempre hamosu polémika iha rai laran no mundu internacional, ema hotu sente krime ida ne’e perigozu tamba bele hamate povu nia mehi. Povu hakarak egualidade e prosperidade, moris ne’ebé nakonu ho esperansa e justisa. Ida ne’e maka povu nia mehi. Infelizmente, realidade la hamutuk ho povu nia mehi. Loron mundial Anti Korrupsaun sai evidensia luta klase sosial tamba povu sei terus tan problema ida ne’e. Corruption Perceptions Index (CPI), nu’udar instituisaun global ne’ebé iha kompetensia kona-ba lansamentu dadus korrupsaun iha mundu, esplika Timor Leste iha 2020, tuur iha posizaun 86, relata ho Índise Persesaun Korrupsaun iha setór públiku. Evidensia ne’e esplika kultura korrupsaun sei buras nafatin iha Timor Leste.

In termus de “korrupsaun”, deskobre hosi lian Latin “Corruptus” ne’ebé sinónimu iha Inglês “to break”, signifika “sobu, destrui, harahun”. Robert Klitgaard (1988), hakerek livru “Controlling Corruption”, deskobre fórmula kona-ba fatores hirak ne’ebé hamosu korrupsaun. Nia esplika fórmula  C = M + D – A, signifika “Korrupsaun (Corruption) igual Monopoliu (Monopoly) mais Diskrisaun (Discretion) menus Akuntabilidade (Accountability)”.

Esplikasaun ne’e fo komprensaun ida katak korrupsaun akontese tamba ema ne’ebé iha poder halo monopoliu tuir nia diskrisaun (posizaun), relevante ho ema ruma ka grupu ne’ebé aproveita poder polítika (privilejiu) mais falha akuntabilidade hosi posizaun ne’ebé maka iha. Ida ne’e hanesan kestaun exame de konsiensia ba ema ida-ida, liu-liu sira ne’ebé kaer poder iha sistema nia laran. Ema maka ukun, fasil atu monu ba pragmatismu e lakon nia konsiensia tamba hakarak hariku nia-an tuir interese privadu. In termus de poder, sempre eziste tendensaun ruma ba krime korrupsaun, e uma vez akontese kada mandatu governu ida nian (não há mudança só alternância de poder). Paradigma intelektual tenta halo diagnóstiku katak falhansu boot ne’e akontese hosi ema nia privadu ne’ebé deskarakterizadu, laiha konsiensia moral kona-ba oinsa atu uza poder. Portanto, psikolojía públiku lakon ona konfiansa, sira ukun maibe la servi povu tamba korrupsaun, ida ne’e hatudu katak sira nega poder ne’ebé sira impresta hosi povu.

Artigu “Foundational Understanding of Corruption”, hakerek fatores hirak maka hamosu korrupsaun; Fatór primeiru, ligado hosi fatór individu, tamba presaun ekonomia, e oportunidade obriga ema halo korrupsaun. Problema ida ne’e ligado ba ambisaun e ema nia integridade. Fatór segundu, korrupsaun mosu tamba laiha transparensia jestaun públiku e sistema kontrolu ne’ebé diak. Fatores rua ne’e esklarese katak krime ida ne’e depende vontade polítika governu nia ne’ebé responsivel e sustentavel hodi atinje medida prevensaun.

Pontu de vista hosi públiku agora fo ezame moral ba governu, oinsa sira nia komitmentu luta hasoru korrupsaun. Parlementu Nacional Timor Leste aprova lei, forma Komisaun Anti-Korrupsaun (KAK) iha loron 29 fulan Juñu tinan 2009. Depois de aprovasaun, sei presija tempu naruk atu forma baze legal kona ba servisu KAK ninian. Kuaze tinan sanolu nia laran (2009-2020), Timor laiha instrumentu ne’ebé forte, tamba ne’e iha dalan klaran, conserteza mosu tendesia makas ba aktu korrupsaun iha sistema governasaun. Apesar governu forma tiha ona KAK desde 2009, maibe realidade hatudu durante ne’e governu seidauk aprova lei kona-ba legalidade atu konkretiza funsaun KAK nia ba medida prevensaun korrupsaun iha Timor Leste.

Parlementu Nacional iha tinan 2020, foin aprova lei foun KAK nia kona-ba implementasaun tékniku e estabelese mekanismu sira ne’ebé presija. Governu aprova ninia promulgasaun husi Prezidente Repúblika, liu hosi dekretu Lei Númeru 7/2020, ne’ebé defini medida prevensaun no kombate korrupsaun, publika iha loron 26 fulan Agostu 2020. Lei ne’e sei vigóra iha loron 180 hafoin ninia publikasaun (mais ou menus iha fulan Fevereiru, 2021). Governu nia vizaun atu estabelese mekanizmu ne’ebé efetivu hasoru korrupsaun, kumpre prinsípiu fundamentál Lei-inan nian, hanesan universalidade direitu, igualdade no legalidade.

Tuir lójika povu nian, wainhira instrumentu e mekanismu KAK nia kompletu no hamriik ho nia imparsialidade, concerteza desde KAK harii iha tinan 2009 liu ba, povu bele akompanha servisu KAK nia atu halo investigasaun, e buka evidensia kona ba funsionariu públiku sira inklui membru partidu ne’ebé iha tendensaun polítika ba aktu korrupsaun. Komitmentu governu hasoru korrupsaun, sei hamosu pontu interogasaun boot hosi públiku, sera que durante ne’e laiha aktu korrupsaun iha sistema polítika nia laran?

Desde nia aprovasaun, KAK hamriik ho vizaun: Timor-Leste, Estadu Demokrátiku ne’ebé ho kultura ida forte, la simu korrupsaun ba interese no prosperidade povu nian”. Maibe públikumerese atu preokupa, sera que durante ne’e, iha tendensia hosi interese polítika ruma, ne’ebe maka impede KAK nia funsaun nudar orgaun ne’ebé ho espíritu luta hasoru korrupsaun. Duvidas ne’e hamosu polémika kona-ba komitmentu anti korrupsaun iha Timor Leste. Kada tinan governu selebra KAK nia komemorasaun desde aprova iha tinan 2009, maibe povu la hatene, oinsa KAK nia rezultadu servisu, nusa governu iha tinan hirak nia laran seidauk aprova KAK nia instrumentu legal atu forma medida prevensaun e investigasaun.

Poder Sempre Hamonu Ema ba Korrupsaun

Uluk iha tempu rezistensia, luta nain sira hasoru inimigu, agora povu kontinua luta hasoru korrupsaun. Sera que, sei iha atensaun ba asuntu ida ne’e? Kestaun fundamental ne’ebé hafanu ema hotu nia konsiensia, tamba realidade hatudu korrupsaun durante tinan ba tinan ameasa povu nia moris. Lord Acton (1834–1902), koalia pensamentu ne’ebé importante katak “Power tends to corrupt, absolute power corrupts absolutely”. Sentido hosi pensamentu ida ne’e hatudu direitamente krítika governu ka ukun nain sira maka iha poder polítika ne’ebé boot, sempre iha tendensaun ba korrupsaun. Lord Acton fahe nia hanoin katak Governu maka iha poder no autoridade, kualker tempu bele aproveita posizaun hanesan oportunidade ida atu hariku nia-an e viola povu nia direitu.

Lord Acton hatudu iha sistema ida nia laran, sempre iha tendensaun ruma ba sira ne’ebe maka kaer poder polítika, ho fasilidade ne’ebé maka iha, sira fasil atu monu ba korrupsaun. Esplikasaun ida ne’e hatudu kona-ba krizi moral e krizi rensponsabilidade e krime ne’e kria hosi ema nia karákter, ne’ebé nunka satisfas ba ema ida-ida nia ambisaun atu akumula materia ho maneira saida deit, abuza poder atu estraga ema barak nia interese. Akontesementu ne’e hatudu korrupsaun tama kategoria krime extraordináriu, katak ema ne’ebé maka kaer poder iha potensia halo kamuflase e asaun invisivel iha aktu korrupsaun hodi salva nia-an hosi sansaun ruma. In termus de krime extraordináriu ne’e signifika atu hatudu diferensia entre krime hosi ukun nain sira (elite) ho ema sivil baibain, esemplu maka naok sasan ruma, ne’ebe nia (ema sivil) sei fasil atu hetan sansaun kriminal. Apesar, ukun nain sira halo ona korrupsaun, maibe dalabarak sira sei susar hetan sansaun hosi krime ne’ebe maka sira halo. Diferensia hosi kazu rua ne’e maka hatudu korrupsaun hanesan krime ida ne’ebé extraordináriu.

Lei Internacional Kontra Korupsaun

The United Nations Convention Against Corruption (UNCAC/ sigla Inglês) hanesan Konvensaun internacional kombate korrupsaun, liu Resolusaun Númeru 58/4 iha 31 Outubro e depois de implementasaun iha 14 Desembro 2005. Resolusaun ne’e primeira vez harii e hatudu vontade koletivu entre nasaun iha mundu internacional e estandar internasional kona-ba mitigasaun ba risku korrupsaun. Iha 2020, hamutuk 187 nasaun iha ONU nia okos maka ratifika tiha ona konvensaun ida ne’e. Timor-Leste ratifika konvensaun internacional kona-ba kombate korrupsaun ne’e iha tinan 2009. Implementasaun UNCAC obriga Estadu tenke alinha instituisoens no sistema nasional tuir konvensaun e relatoriu periodikamente kona-ba progresu implementasaun. Importansia husi implementasaun tratadu ne’e atu tulun halo reformasaun, e hadi’a sistema no instituisaun nacional hodi kria transparensia no akuntabilidade orgaun públiku.

*(Everd Scor Rider Daniel nudarAluno Relações Internacionais e Escritor Media)

Print Friendly, PDF & Email

LEAVE A REPLY

Please enter your comment!
Please enter your name here