Reportazen Zevonia Vieira
Ministeriu Saude (MS) deteta tan kazu konfirmadu foun COVID-19 hamutuk 41 iha municipio Dili. Liu hosi zoom press conference, Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo relata ba jornalista sira katak evolusaun surtu COVID-19 iha municipio Dili, iha kaz foun 41, nune’e, kazu detetadu ka pozitivu iha Munisipiu Dili husi loron 7 Marsu 2021, to’o ohin loron 31 Marsu 2021, hamutuk 456.
Ho nune’e, iha Munisipiu Dili, sei iha cluster 46, maka sei nafatin hatudu atividade hada’et tutan virus SARS-CoV-2 husi ema ida ba ema seluk, liu-liu iha Suku Bebobuk, Fatuhada ho Comoro.
Dadus jeral loron 31 Marsu kazu foun 41, kazu rekuperadu nain 8, total kazu ativu hamutuk 415. Husi total kazu foun ohin mane 24, feto 17, sintomátiku nain 3, asintomátiku nain 38.
Husi horiseik mai ohin hamutuk halo 1008 testes PCR, inklui ona iha laran 480, ne’ebé mai husi pedidu autorizasaun esepsionál atu sai husi serka sanitária iha Munisipiu Dili.