Reportazen Zevonia Vieira
Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo informa ba jornalista sira liu hosi zoom press conference loron 31 Marsu, katak ohin madrugada fatin izolamentu Vera Cruz simu tan kazu detetadu ida, sintomátiku no grave.
Dr. Rui dehan kazu ne’e inan ida,idade 69, iha istoria diabete ho obesidade. Hahu isin-manas n i’is-bo’ot semana ida ona. Oras ne’e dadaun halo hela tratamentu ba infesaun seluk ne’ebé mós afeta ninia pulmaun, no pasiente uza hela ‘’high flow oxigen’’.
Dr. Rui mos informa iha mós kazu detetadu nain 3, sintomátiku moderadu, ne’ebé mós oras ne’e iha fatin izolamentu Vera Cruz. Sira nain 3 nia kondisaun estável.
CIJK apela ba komunidade iha fatin ne’ebé maluk sira rekuperadu sira hela bá, favor labele tauk, tamba sira ne’ebé sai husi fatin izolamentu, ekipa saúde sira sertifika ona, katak sira la iha ona risku atu hada’et-tutan virus ba ema seluk
Apela ba populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek, lalika sé tilun ba lia-anin ka rumores, pratíka nafatin medida sira hanesan uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, hamri’ik ka tur do’ok husi ema seluk, mínimu metru ida ho balun.
