Reportazen David da Gusmao*
Iha ekipa Forum Organizasaun Naun Governamental Timor-Leste (FONGTIL) hamutuk ema nain 25 mak voluntarimente hakarak simu vasina AstraZeneca.
Diretor Ezekutivu FONGTIL, Daniel dos Santos hateten sira hetan informasaun katak vasina ne’e bele aumenta ema nia imunidade, hodi hasoru COVID-19.
“Entaun ami foti dezisaun ida, mai halo vasina voluntariamente, tanba ami hanoin katak, ami bele asegura ami nia an, hodi halo serbisu atende ba komunidade. Tanba ami mos konsidera katak ami mos serbisu iha lina frente”, dehan Diretor Ezekutivu FONGTIL Daniel ba jornalista sira iha Centro clinika Farmosa, 20/04.
Nia haktuir sira mos serbisu iha lina frente, tanba halo monitorizasaun ba estadu emerjensia, regras serka sanitaria no mos halo atividade umanitaria.
“Antes ita sofre inundasaun, ami halo atividade umanitaria fo apoiu ba estudante sira, identifika ema vulneravel, satan iha inundasaun ne’e, entaun ami kontaktu ho ema barak, ho ida ne’e mak ami deside, diak liu ita vasina, para atu seguru hodi halo asistensia ba ita nia populasaun sira”, nia esplika.
Nia dehan informasaun sira ne’ebe mak rona hosi Dotor, Ministeriu Saude no Organzasaun Mundial Saude informasaun sira ne’e konvense, “katak vasinasaun ne’e seguru, automatikamente iha mundu laiha vasina ida mak la seguru 100% laiha ida, ita boot sira buka mos laiha, maibe informasaun ne’ebe ami hetan konaba vasina AstraZeneca konvense ami, ho hanoin ida ne’e diak, mak ami mai voluntariu simu vasina”.
Nia dehan iha faze primeru ne’e sira mai ho membru FONGTIL hamutuk nain 25, “maibe ida ne’e hanesan fase primeru ne’ebe ami hetan, depois ami sei halo kampaña no sensebiliza ba iha ONG sira iha Munisipiu, no ami nia membru sira hamutuk 230 sira sei simu vasina hotu”.
Iha fati hanesan membru FONGTIL, Satorlinu Piedade hateten vasina ida ne’e relasiona ho saude, iha obrigasaun atu tuir vasina, atu bele iha saude ne’ebe diak hodi halo atividade nafatin.
“Hau pessoal prontu vasina, hau iha obrigasaun atu tuir vasina ida ne’e, vasina ne’e mos hanesan mata dalan ida, hatudu ba sosiedade sira katak, ita bele koalia buat hotu maibe saude ne’e importante ba ita. Vasina ne’e hanesan pasu pozitivu ida ba hau, se hau hetan vasina, hau iha esperansa katak bele hamenus ona virus COVID-19 iha hau nia isin”, dehan Satorlinu.
*(David da Costa Gusmao nudar estudante UNTL ne’ebe halo estajiu iha Neon Metin)