Reportazen David da Costa Gusmao*
Governu Australia liu husi sira nia embaixada iha Timor-Leste, hamutuk ho kampania Santos, apoiu helicóptero ida ba estadu Timor-Leste, atu bele responde ba iha area oin-oin no ba inundasun.
Embaixador Australia, Peter Robert informa liu husi parseria Kompania Santos, bele apoiu ona helicóptero ida ba Timor-Leste, hodi bele uza iha area oin-oin ne’ebe bele ajuda Timoroan sira ne’ebe enfrenta inundasaun no pandemia COVID-19.
“Apoiu ne’e ba fulan ida, maibe hau Espera katak bele uza helicóptero ne’e iha area oin-oin, depende ba nesesidade kontratu governu Timor-Leste nian hakarak no seluk tan, ami prontu kontinua serbisu hamutuk ho Timor-Leste iha area oin-oin, laos ba inundasaun deit maibe ba mos iha pandemia COVID-19 tanba Kazu kontinua aumenta,” esplika Peter Robert iha aero portu Nicolao Lobatu Dili, 21/04.
Iha fatin hanesan Diretor Kompania Santos, Jose Lobato Goncalves hateten foin dadauk inundasaun akontese iha Timor halo estragus hotu, komunidade nia uma no estrada no pontes sira aat hotu, ho ida ne’e mak halo aprosimasaun husi governu husu kompania Santos, sei bele ajuda ho helicóptero atu bele responde situasaun inundasaun, ne’e mak kampania Santos halo esforsu buka bele serbi nasaun.
“Emprinsipiu kompania Santos ajuda governu buka helicóptero iha Australia lori mai Timor no mos reprezenta kompania seluk, iha komitmentu halo kontribuisaun ba kustu $250 mill, ne’e mak Santos fo kontribuisaun ba nian kustu”, esplika nia.
Vise Ministru Interior, Antonio Armindo agradese ba governu Australia, ne’ebe sempre disponivel atu kontribui ba dezenvolvimentu Timor-Leste, inklui iha tempu defisil sira hanesan agora dadaun hasoru Kalamidade/dezastre natural no surtu COVID-19.
“Atu fasilita mobilizasaun ajudus humanitaria ba iha areas remotas, inklui fasilita aimoruk no mos ai-han ba ita nia populasaun iha munisipiu ne’ebe iha difikuldade asesu tanba estradas no pontes aat,” nia dehan.
*(David da Costa Gusmao nudar estudante UNTL ne’ebe halo estajiu iha Neon Metin)