Reportajen David da Costa Gusmao
Povu Timor sura deit ona loron hodi komemora loron restaurasaun independensia ba dala 19, maibe iha tinan ne’e rasik povu Timor mos hasoru hela virus CARS-CoV-2 ne’ebe mak konsege rezulta ema nain 10 mate ho COVID no konfirmadu pozitivu COVID liu ona 1000 resin.
Sai ona tradisaun kada tinan, bainhira atu komemora loron independensia, iha sidade Dili, dalan ninin sira labarik sira no jovem sira rame-rame faan bandeira RDTL, atrai komunidade sira bele sosa hodi monta iha uma ka transporte sira.
Iha tinan ne’e iha situasaun surtu COVID ne’ebe hamosu Serka Sanitaria no Konfinamentu Obrigatoriu liu-liu kapital Dili, katak populasaun ne’ebe laiha nesesidade importante iha liur, diak liu hela iha uma, atividade eskola para total no atividade reliziojas mos labele halao, nune bele redus risku hadaet virus hosi ema ida ba ema seluk, liu-liu ba ema sira ne’ebe iha moras kronika ka idade avansadu.
Jornalista Neon Metin dadalia ho Natalia de Araujo, idade 11 faan bandeira iha portu Dili nia oin. Ba Neon Metin nia dehan tempu agora faan bandeira folin los, tanba loron 20 de Maiu. Nia intensaun faan bandeira mos tanba bele hola netik hahan no nesesidade eskola nian
“Iha tempu serka sanitaria no konfinamentu obrigatoriu, hau iha deit uma hau baruk los, ita mos la ba eskola, entaun hau deside mai faan bandeira atu hetan netik osan ruma, hodi hola hahan, no bainhira eskola tama fali karik hau bele hola hau nia kadernu ,lapizeira no kamisa eskola nian,” dehan Natalia ba Neon Metin iha ponte kais Dili nia oin, Segunda 17/05.
Nia haktuir banhira mai faan iha ne’e, sai husi uma oras tuku 7:00 dader, bandeira faan ne’e hola iha loja Xina, hola pakote ida hodi mai faan. Bandeira pakote ida (lusin) kona US$ 2.50, pakote ida bandeira iha 12.
“Ami faan fali ida prese $1.00, no lusin ida ami faan hotu ami bele hetan $12.00. Hau faan ona durante loron hitu iha fatin ne’e, loron ida hau hetan $5.00. Ema barak entaun bele hetan $10.00 liu, iha loron hitu hau faan ne’e hau hetan ona $40.00 liu. Bainhira faan hotu fila ba uma tuku 16: 00 Otl liu”, tenik Natalia.
Nia dehan tempu serka sanitaria no konfinamentu obrigatoriu, bainhira mai faan hanesan ne’e, senti tauk polisia sira, maibe polisia sira mos mai dehan, imi bele faan maibe kuidadu bandeira labele monu no uza maskra nafatin no halo distansia fiziku.
Iha fatin hanesan David de Araujo idade 20, faan mos bandeira iha dalan ninin, ba Neon Metin nia dehan serka sanitaria no konfinamentu obrigatoriu, iha deit uma baruk los, la eskola tan, ho ida ne’e mak mai faan tiha bendeira iha ne’e, atu bele hetan osan hodi hola sasan sira ne’ebe mak presiza.
“Situasaun hanesan ne’e, ita senti tauk atu sai maibe ita mos iha deit uma ita baruk los ho ida ne’e mak hau hakarak lori bandeira mai faan iha ne’e, atu bele hetan osan hodi hola hahan, no bainhira eskola tama fali karik bele hola ba kadernu, lapizeira no sapatu sira atu uza. Tanba durante eskola online ne’e, hau nia telefone laiha atu asesu ba eskola online,” nia dehan.
Nia haktuir Bandeira ne’ebe mak faan ne’e vizinu sira mak hola, no hau lori ba faan, depois faan mak vizinu sira fahe osan mai, “hau faan vizinu sira nia bandeira loron ida deit, tanba loron ida hau faan hetan $15.00, entaun hau fo tiha $15.00 no sira fo fali hau $5.00. entaun hau lori osan ne ba fali hola bandeira iha loja Xina. iha loron rua ne’e hau hetan ona $25.00.
Neon Metin observa katak labarik sira haksolok hodi faan bandeira, no aprosima ema sira ne’ebe liu hodi sosa sira nia bandeira. La baruk sira kontinua hakilar ho kode bandeira..bandeira…bandeira bainhira motor ka kareta liu tesik. Hetan netik dollar ida, halo sira hamnasa. Ida ne’e mak sira bele halo iha situasaun COVID-19 no konfinamentu obrigatoriu nia laran, maske hetan deit dollar ida ka rua, maibe ba sira, ne’e hanesan grasa ida, tanba sira hetan osan liu hosi sira nia kosar wen rasik, laos liu hosi dalan ismola ba ema.
