Reportajen David da Costa Gusmao
Sekretaria Estadu Kooperativa (SEKOOP) realiza formasaun tékniku ba funsionáriu sira nin 15, ho objetivu atu eleva kapasidade funsionáriu sira nia relasaun ho inspensaun auditoria.
Sekretariu Estadu Kooperativa, Elizario Ferreira hateten formasaun ba funsionaria nain 15, GIA-SEKOOP ne’e organiza hosi auditoria SEKOOP ho objetivu atu eleva kapasidade funsionária sira nia relasaun ho inspesaun auditoria.
“Formasaun ida ne’ebé organiza hosi Gabinete Inspesaun Auditoria SEKOOP (GIA), nune’e bele akompaña monitoriza superviziona internalmente funsionáriu sira nia serbisu iha ezekutivu SEKOOP nian ba akompaña mos dezenvolvimentu no movimentu kooperativa nia ne’ebé mak eziste iha Timor-Leste,” esplika Elizario Ferreira iha Salaun Fokupers, Kinta 27/05.
Nia haktuir, dadaun ne’e iha Timor-Leste iha 167 kooperativa mak funsiona hanesan instituisaun, entaun presiza instituisaun ida forte ho koñesimentu ne’ebe di’ak, atu bele akompaña prosesu dezenvolvimentu Kooperativu, atu kooperativa no asegura ninia sustentabilidade ho nia estabilidade finanseira no ekonómika iha vida kooperativa, hodi serbí didi’ak ninia membru sira no mós serbí populasaun hodi kontribui ba dezenvolvimentu estadu nia.
Iha fatin hanesan Inspetór Gabinete Inspesaun Auditoria Sekoop, Henrique de Oliveira Ximenes hatete, atividade ohin ne’e fo formasaun tékniku ba funsionáriu sira kona ba inspesaun no auditoria, atu halo baze de legais hodi formadu sira bele hatene no iha koñesimentu auditoria ba inspesaun no fiskalizasaun.
“Formasaun auditoria ne’e hare liu ba ba aspetu legalidade kontabilidade, operasionál no aspetu organizasaun no ida ne’e mak formadu sira sei hetan, atu bele asegura dezenvolvimentu instituisaun kooperativa nia,” nia esplika.
Entretantu formadus sira ne’e hamutuk nain 15, feto 5 mane 10, nain 4 husi Gabinete Sekoop nian no sira seluk husi Diresaun aprovizional, no formasaun ne’e halao durante loron rua.