Reportajen Zevonia Vieira
Ministeriu Saude (MS) deteta tan kazu konfirmandu pozitivu COVID-19 iha loron 27 Maiu hamutuk 213. Liu hosi komunikadu imprensa, Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo relata ba jornalista sira katak ohin deteta kazu pozitivu COVID hamutuk 213 (iha Dili 182, iha munisipiu seluk 31).
Husi total kazu detetadu foun ohin mane 124, feto 89, hosi total kazu detetadu foun ohin, hirak ho idade tinan ho idade 60 nain 9. Husi total kazu detetadu foun ohin, proporsaun kazu sintomátiku hamutuk 9,3%.
Kazu rekuperadu 225, total kazu ativu iha nain 2727. Total kazu konfirmadu kumulativu sura hosi loron 21 Marsu 2020 to’o ohin loron hamutuk 6459 no total óbitu ne’ebé relata ohin nain ida, mane idade 59 timoroan hela iha Mascarenhas, Postu Administrativu Cristo Vera Cruz, ohin dader maizu umenus tuku 3 madrugada, ba HNGV ho keixa isin-manas, muta, kabun laran moras durante loron 2 iha uma.
“Matebian iha mós istória operasaun fatuk iha rins. Hafoin halo ezame fiziku no ezame komplementar sira seluk, médiku sira to’o iha diagnóstiku traballu (working diagnosis) peritonite no septic shock. Para alem ida ne’e, deteta mós pozitivu SARS-CoV2 ho Cycle Threshold (CT) N2gene 40,8, Egene 38,8”, informa Dr. Rui, 27/05.
Nune’e ekipa saúde lori husi HNGV transfere ba fatin izolamentu Vera Cruz, no i’is kotu iha 11:50 ho multiple organ failure.
Ema ne’ebe halo teste PCR hosi horseik to’o ohin loron hamutuk 1604 iha Dili. Numeru kazu COVID iha Dili kontinua sae, kazu ativu iha Dili oras ne’e dadauk hamutuk 2218, kazu rekuperadu iha Dili no total kazu obitu to’o ohin loron hamutuk 15 (14 iha Dili no nain 1 iha Liquisa)
