Reportajen David da Costa
Sekretariu Jerál Partidu Frente Revolusionáriu de Timor-Leste Independente (FRETILIN), Dr.Marí Alkatiri, hateten, atu marka data eleisaun Parlamentár 2023 ne’e kompeténsia Prezidente Repúblika,Dr. José Ramos-Horta nian no partidu polítiku sira, fó opiniaun ba Prezidente Republika laos ba iha públiku hotu.
“Atu marka data eleisaun ne’e kompeténsia Prezidente nian, ami fó opiniaun ba Prezidente laos ba publiku,” Dehan Sekretáriu Jerál Partidu Frente Revolusionáriu de Timor-Leste Independente (FRETILIN),Dr. Marí ba jornalista sira hafoin remata enkontru ho Prezidente Repúblika iha Palásiu Prezidente Bairo-Pite, Segunda 6/02.
Nia haktuir hanesan partidu boot iha Parlamentu Nasionál, no Prezidente simu dala ikus liu, iha enkontru ne’e diak tebes. Prezidente nia preokupasaun barak, hahú husi preokupasaun sobre desizaun ba iha eleisaun parlamentár, atu labele kontra konstituisaun. Maibé iha fatór seluk tan, tenke konsidera, tanba Prezidente mós hanesan reprezentante iha rai laran ho rai liur.
“Enkontru ida ne’e laos finál, maibé Prezidente sei hasoru malu ho sosiedade sivíl no setór sira seluk tan, i depois sei presiza atu ko’alia fali ho ami , sei bolu fali, sei konvida fali ami, mai ko’alia ho nian, depois maka marka data eleisaun parlamentár 2023,” Nia esplika.
Alende ne’e nia mós ko’alia katak FRETILIN dezde moris to’o mai agora nia preokupasaun maka povu, estadu no nasaun, tanba ne’e atu kontribui ba povu nia di’ak para hametin estadu harii nasaun hodi prontu fó solusaun.
“Maibé estadu ne’e atu sai estadu direitu demokratiku ita tenke tau konstituisaun no lei iha leten,” tenik nia.
Entretantu Prezidente Republika hasoru malu ona ho partidu politiku sira seluk ne’ebe hetan asentu iha Parlamentu Nasional hodi hato’o sira nia opiniaun, maka hanesan Partidu Uniaun Demokrátika Timorense (UDT), partidu Frente Mudansa (FM), Partidu Unidade Dezenvolvimentu Demokrátiku (PUDD), Partidu Kmanek Haburas Unidade Nasionál Timoroan (KHUNTO), Partidu Demokrátiku (PD), Partidu Libertasaun Popular (PLP) no Partidu Kongresu Nasionál Konstrusaun Timor (CNRT)
