Reportjen Silvino Freitas
Impaktu mudansa klimátika husi udan no anin bo’ot, ne’ebé akontese durante semana ida iha inísiu fulan Fevereiru 01-06, Autoridade Protesaun Sivíl (APC) rejistu uma-kain tolu hetan estragus inklui ema nain 2 lakon vida.
Diretór Relasaun Esterna no Komunikasaun Anacleto Caetano hateten, desatre naturais ne’e akontese iha munisípiu rua maka Baucau inséndiu ba uma-kain ida, hodi rezulta ema ida lakon vida no Ermera impaktu husi klima nune’e uma ida ai-hanehan no ida rai-halai hodi hanehan.
“Inan-feton ida naran Maria Guterres idade 64 husi Baucau lakon-vida tanba provoka husi inséndiu, iha fali Ermera ai monu hanehan uma ne’ebé rezulta sidadaun Alfredo Salsinha lakon vida” dehan Anacleto Caetano liuhusi komunikadu-imprensa iha APC Kaikoli, (06/02).
Nia dehan, akontesimentu ida ne’e APC munisípiu Ermera no Baucau hala’o kedan intervensaun ba apoiu emerjénsia ba dezastre naturais hirak ne’e ho emediatamente.
“Iha apoiu ida ne’e APC hamutuk kedan ho Ministériu Sosiál, ajuda ba funerál no food-item non food-item balun ba vitíma sira ne’ebé sofre iha dezastre naturais” nia dehan.
Entretantu dadaun ne’e prosesu levantamentu ba dadus dezastre naturais nafatin la’o iha munisípiu hotu, bainhira remata verifikasaun remata sei hetan aprovasaun, nune’e bele distribui apoiu hodi rekoopera ba dezastre hirak ne’e.
