Reportajen David da Costa
Tinan ida ne’e Timor-Leste kompleta nia aniversáriu ba Proklamasaun Independénsia ba tinan 50, Prezidente Repúblika (PR) konsidera setór agrikultura iha Timor-Leste ne’e avansadu, mas la sufisiente tanba nunka iha investimentu ne’ebé maka’as husi estadu ba setór agrikultura.
Prezidente Repúblika (PR) José Ramos-Horta, dehan mezmu agrikultura iha avansadu maibé ladauk sufisiente tanba laiha investimentu maka’as ba iha setór agrikultura ne’e rasik, entermus infansiamentu hodi fó biban ba mikro kiik sira nune’e iha korajen ba agrikultura.
“Agrikultura avansadu, mas la sufisiente, no la to’o, tanba nunka iha investimentu ne’ebé maka’as husi estadu ba setór agrikultura”dehan PR Horta hafoin sai oradór ámbitu reflesaun nasionál tinan 50 aniversáriu proklamasaun independénsiaTimor-Leste nian iha Salaun Auditóriu Fakuldade Siénsia Sosiais UNTL Kaikoli, Dili, Kuarta 09/04.
Tanba ne’e, investimentu ba iha setór agrikultura la’ós tau osan de’it ba Ministériu agrikultura, maibé devia tau osan iha banku BNCTL nune’e bele halo emprestimu kaman, ho funan kaman nune’e família sira bele iha korajen didi’ak an ba agrikultura.
Nua esplika tenke iha apoiu tékniku maka’as, tanba maiória laiha koñesimentu tekonolójia foun di’ak ba agrikultura. Bainhira ko’alia agrikultura, ko’alia mós kona-ba pekuaria, buat oi-oin la’ós de’it foos, batar, mais aifuan, aifunan buat sira ne’e hotu, ne’e mak fallansu.
Nia argumenta, mas buat seluk la’o, la signifika ekonómia la la’o, mas la sufisiente, ne’e mós normál. Tanba, rai barak Arabe sira riku, sira mós hahú de’it ho mina, maibé osan mina mak sira agora riku liu tan, diversifika sira nia ekonómia.
Maibé, agora tenke haree lei ne’ebé kona-ba investimentu, rezolve problema rai, problema mak ida ne’e investedór mai ko’alia ho ministru sira, depois ministru sira la fó andamentu
Nia fó ezemplu oan ida konkretu Índia, dezde nia ba vizita iha Índia iha tinan ida liu ba, Primeiru Ministru Índia hakarak apoiu Timor-Leste halo dijtalizasaun ba pagamentu
Nia esplika, Índia ne’e top iha mundu, Índia 1.5 biloens, Índia tomak dijitalizadu, tun ba sira nia aldeia sira kiak sira dijitalizadu hotu, sira hatete sira prontu apoiu Timor-Leste.
Tanba ne’e sira ko’alia tiha ona ho membru governu, mas to’o agora governu la resposta.
“Ha’u mak Primeiru Ministru ha’u hatete ba Índia, ha’u hakarak asina akordu agora kedas, tanbasá mak Ministru Komunikasaun la fó resposta,” hatete nia.
