Reportajen David da Costa
Assosiasaun Dalan ba Naroman (ADBN) fahe ekipamentu karosa, rede númeru 1 no 2, ai-suak besi, botas, maskra, luvas, rompi, ouklu no kapasete salva ulun ba komunidade pineira rai-henek iha mota Comoro, postu Dom Aleixo Munisipiu Dili.
Diretór Ezekutivu Asosiasaun Dalan ba Naroman (ADBN), Noel Soares Pinto hateten antes ne’e ADBN mos hala’o ona atividade hanesan ne’e iha tinan kotuk, no konsege distribui ona ekipamentu sira ba komunidade mineiru iha suku Bebonuk no Manleuana. Nune’e atividade distribuisaun ekipamentu ne’e hanesan kontinuasaun hosi atividade iha tinan 2022 nian.
“Atividade ohin ne’e kontinua de’it atividade tinan kotuk nian ne’ebé ita konsege fahe ona ekipamentu sira ba benefisiáriu hamutuk na’in 54 hosi suku rua Bebonuk ho Manleuana. Ohin ita fahe tan ba benefisariu hamutuk na’in 15 hosi área mota Comoro de’it, tuir mai sei fahe mós ba ema na’in 35 tan hosi área Bebonuk no Madohi ninian. Entaun Benefisariu sira ne’ebé ami alista ona sira nia naran, ami esforsu atu semana ida ne’e nia laran sira bele simu hotu ona sasan,” dehan Diretór Ezekutivu ADBN, Noel Soares Pinto, iha Comoro, Segunda 6/06.
Iha âmbitu distribuisaun ekipamentu ne’e, Diretór Ezekutivu ADBN, Noel Soares Pinto husu ba benefisariu sira atu bele uza ekipamentu sira ne’e ho kuidadu nune’e bele uza ba tempu naruk.
“Ba inan-aman sira ne’ebé ohin simu ona ekipamentu sira ne’e, ha’u husu atu uza sasan sira ne’e ho kuidadu, nune’e bele ajuda imi nia servisu lor-loron iha mota laran ba tempu naruk nian no husu atu labele faan tutan fali sasan sira ne’e ba ema seluk, ne’e proividu,” nia husu ba benfisiariu.
Nune’e mós Diretór Ezekutivu ADBN enkoraja mós ba komunidade sira ne’ebé seidauk simu iha etapa ida ne’e, atu labele laran susar, tanba sei iha oportunidade etapa tuir mai no fiar katak komunidade mineiru iha área tarjetu sira sei hetan hotu.
Ba oin ADBN kontinua esforsu atu buka dalan ko’alia ho emprezáriu, Governu nomôs ajénsia sira hodi kontinua fó apóio ba sira nian programa servisu ba komunidade mineiru sira. Tuir planu tentativa, tinan ne’e ADBN sei organiza atividade adisional sira hanesan medical chek-up regularmente ba komunidade mineiru sira, atividade sensibilizaun ba hadomi meiu ambiente nomós protesaun fasilidade públiku sira.
Iha fatin hanesan reprezentante benefisiáriu, Pedro Pereira Maria, sente kontente hetan apoiu ekipamentu sira ne’e hosi VIIIG liuhusi ADBN. Nia promete katak sei uza ekipamentu sira ne’e iha nia servisu lor-loron iha mota laran.
“Ami sente kontente loos bainhira hetan apoiu sira ne’e tanba ne’e ha’u lori maluk pineradór sira nia naran hakarak hato’o obrigado wai’n ba Governu no mós ekipa ADBN ne’ebé mak durante ne’e halo esforsu tomak buka dalan hodi fo apóio ami,” Nia Agradese.
Nune’e mós sira rekomenda ba Governu atu kontinua fó apoiu ekipamentu sira ne’e tanba sira nia maluk sira ne’ebé lor-loron pineira rai-henek hamutuk iha ne’e barak mak seidauk hetan ekipamentu hanesan ne’e.
Total benefisariu ne’ebé hetan apoio ekipamentu suporta rai-henek hosi ADBN tuir lista ne’ebé iha hamutuk na’in 104. Enkuantu hosi total benefisariu ne’e balun simu ona iha tinan 2022 no balun sei simu kompleta iha tinan ida ne’e.
Enkuantu sasan sira ne’ebé ekipa ADBN distribui ba komunidade pineiru rai henek mak hanesan karosa, rede númeru 1 no 2, ai-suak besi, botas, maskra, luvas, rompi, ouklu no kapasete salva ulun.
Entretantu orsamentu ne’ebé aloka ba sosa ekipamentu sira ne’e mai hosi Servisu de Apoiu Sociedade Sivil e Auditoria Sosiál (SASCAS) liuhusi subensaun públika ho totál orsamentu $15,000.00.
