Reportajen Santina Lucia da Costa
Kandidatu independente ba Prezidente Repúblika (PR), Virgilio da Silva Guterres “Lamukan” rekomenda ba governu poupa osan, salva nasaun, gasta osan minarai gasta didi’ak ho razoavel, investimentu ba setór sira hanesan saude, edukasaun no agrikultura iha retornu longu prazu, retornu sosial garante sustentabilidade ekonómika Timor, bainhira nia eleitu ba PR ba períodu 2022-2027.
Virgilio da Silva Guterres “Lamukan”, hateten, kona-ba Sustentabilidade fundu petroliferu, karik eleitu ba Prezidente Republika tinan 2022-2027, rekomenda ba governu mak poupa osan salva nasaun.
‘Se hau sai Prezidente Republika ba Governu hau nia rekomendasaun mak poupa osan salva nasaun, katak osan minarai ne’ebé ita iha ne’e sé ita gasta ho didi’ak gasta ho razoavél investimentu ba setór save sira hanesan, Saude, Edukasaun, Agrikultura iha retornu longu prazu, retornu sosial ne’e pelu menus sei garante sustentabilidade ekonomika Timor ninian ba longu prazu, maibé sé ita gasta de’it ba infranstrutura osan ne’e ita doku tiha mós ita doubru ba iha tusan estranjeiru aumenta liu tan.” Hateten, Kandidatu Independente ba PR Virgilio da Silva Guterres “Lamukan” iha Programa espesial dalan ba eleisaun Prezidensial, iha TVE, Raikotu, 10/2.
Lamukan dehan kona-ba fundu petrolíferu ne’e redús kapasidade makina estadu nian boot demais, gasta demais, maneira ne’ebé ita poupa osan se bele gasta osan ba setór edukasaun, saude, no agrikultura ne’e tenki sai prioridade atu halo investimentu, atu nune’e pelu menus iha mediu, longu prazu hetan retornu sosiál fundu petrolíferu.
