Reportajen Francisco JDA
Parlamentu Nasionál (PN) ohin hala’o reuniaun ba periodu antes orden do dia, liu reuniaun ne’e Deputadu Partidu Libertasaun Povu (PLP), Abel Pires iha nia intervensaun hateten katak ho ID falsu ne’ebé barak iha media sosial, husu Polísia Sientífika Investigasaun Criminal (PSIC) atu buka tuir, tanba ID falsu sira ne’e buka trata heroi sira ne’ebé luta no dedika sira nia an ba Timor-Leste nia independensia.
“Ha’u lakohi temi naran tanba orsida bele hasae fali tensaun, iha semana kotuk ha’u hare ID ida ne’ebé insulta ita nia líder istoriku maibé husu PSIC atu buka tuir ida ne’e,” hatete Deputadu PLP, Abel Pires iha PN, 31/05
Ho Asuntu ne’e intervensaun hosi Presidente Parlamentu Nasionál (PPN), Aniceto Guteres hateten Katak kona ba internet ema uja ID falsu hodi halo insultu ba lideres sira, dadaun ne’e Ministeriu Públiku hato’o tiha ona esbosu Lei Cybernetika, no iha ona Gabinete Presidente Parlamentu Nasional, halo hela analiza nune’e bele transforma ba projeto lei.
Hafoin intervensaun hosi Secretario Estadu Komunikasaun Sosial (SECOMS), Mericio Akara do Reis informa katak, kona ba ID falsu ne’e iha ona estartejia rua ka tolu, kontinua aselera edukasaun sivika nune’e prepara sidadaun sira tama iha era digital atu ema bele matenek uja digital sira.
“Estratéjia primeiru edukasaun sivika prosesu la’o hela, no kampanha nasionál HOAX mós la’o hela, ita iha ona ekipa atu identifika ID falsu sira, atu hare took intervensaun oinsá. Ekipa halo nia serbisu so atu rekoila de’it ID falsu no semana ida detekta 29 ne’ebé uja sala media sosial, metade ID los (la falsu) mos tolok ema de’it metade ne’e ID falsu balun, ita hatene entaun iha parte tekniku ne’e funsiona hela como ohin ko’alia PSIC tenki funsiona liga ba lei Cybernetika,” hateten Secretario Estadu Mericio Akara.
Sekretario Estadu Komunikasaun Sosial ne’e realsa liu tan, dadaun ne’e halo hela estudu ida, hanesan iha Singapura sira iha lei espesifiku ida kona ba kombate HOAX iha artigu 10, hanesan mós iha Alemaña, nune’e sei halo estudu ida ne’ebé mak di’ak liu, ho situasaun iha Timor sei adobta ida ne’e, maibé estratéjia rua importante mak la’o ona hanesan edukasaun sivika no lei, maibe konforme debate pro kontra iha públiku mak hare.