Reportajen Francisco JDA
Serka Sanitaria (SS) no Konfinamentu Obrigatorio (KO) sai barreira ba motorista taksista sira, tanba susar liu tan atu hetan rendimentu sosa nesesidade báziku hodi sustenta família uma laran. Liu ona fulan ida taksista sira labele halo movimentu tanba impaktu hosi númeru surtu COVID-19 iha Dili ne’ebé kada loron liu hosi ema 100 mak afeta ba beibeik.
Ho situasaun susar ne’e posko Solidariedade Haburas – Farol ne’ebé organiza hosi jovem rezisténsia, ativista, loja na’in no indivíduu buka estratéjia no inisiativa atu oinsá mak bele tulun maluk taksista sira ne’ebé hasoru susar.
Nune’e Posko Soliedariedade Haburas apoiu tan fos Saka 30 ba motorista taksista sira iha Tasi-Tolu, Bebonuk, Comoro inklui fatin seluk ida ne’e, nu’udar apoiu solidariedade, atu tulun maluk sira iha situasaun difisil nia laran.
Hafoin jornalista Neon Metin dada lia ho taksista Bertos da Costa hela iha aldeia Besi Mean, Suku Comoro hato’o katak moris ho taksista ne’e araska tebe,s satan situasaun serka sanitaria iha uma los de’it, movimentu la iha entaun difikulta tebes ba taksista sira atu hetan osan, maibé ohin Fundasaun Haburas mai ajuda ona foos uitoan nune’e hanesan reprezentante taksista hato’o agradese wain ba Fundasaun Haburas
“Ami fo obrigadu ba fundasaun Haburas ne’ebé mai fó ona foos mai ami, maibé hakarak mós sujere ba governu atu loke dalan, para movimentu bele la’o fila fali, selae loroloron iha uma, ha’u mai buka osan uitoan iha benkel ema nia, dalaruma loron ida hetan $1.00 too $2.00 dólar,” hateten Bertos da Costa iha Tasi Tolu, 01/06
Sorin seluk taksista Versiano da Costa hela iha Aldeia Metin 4 Bebonuk sente laran taridu tanba movimentu la iha, oinsá mak bele hetan osan buka osan hodi fo han fen no oan selae susar liu, mesmu hodi fo han familia iha uma laran. Situasaun susar ne’e hetan apoiu natoon hosi Posko Solidariedade Haburas Farol.
Antes ne’e Koordenador Posko Haburas Farol, Pedro Hortencio Vieira ba Neon Metin hato’o katak, realidade hatudu taksista sira hasoru susar kleur ona tanba labele halo operasaun, nune’e bainhira Posku Habuars halo survey ida, nota katak bairru barak la hetan apoiu ai-han ruma, hatudu katak krize ai-han ne’e la’ós iha loron 4 Abríl ne’e, maibé hahú kedas hosi Estadu Emerjensia entaun nia impaktu ne’e kleur ona ba taksista no traballadór.
” Ami hasoru sira, maibé posko nia kemampuan mak uitoan de’it ona, entaun posko prepara foos saka 11, mas lolos posko hare ba inundasaun iha loron 4, maibé ema barak mak terus, la’ós de’it afeta hosi inundasaun tan ema balun mak serbisu, maibé ema sira mak la efeta inundasaun ne’e terus barak ona besik tinan ida,” hateten Koordenadór Posko Solidariedade Haburas Farol, Pedro Hortencio Vieira