Reportajen Zevonia Vieira
Akontesimentu membru polisia tiru mate ema nain rua no nain ida kanek iha Lahane, iha loron 5 Juñu oras madrugada, ho akontesimentu ne’e organizasaun Resistencia Nacional dos Estudantes de Timor-Leste (RENETIL) deklara liu hosi komunikadu imprensa katak aktu violentu membru PNTL hasoru sidadaun na’in tolu iha Lahane, RENETIL espresa laran susar boot ba matebian Mateus de Deus no Camilo de Deus, ne’ebé lakon sira nia moris, tanba aktu irresponsavel husi membru PNTL ida.
RENETIL kondena makaas aktu membru PNTL ne’ebé uza forsa la-ho justifikasaun, no la’os iha kontestu hala’o nia serbisu atu hametin lei no orden. RENETIL komprende emosaun husi komunidade no família vítima na’in rua hasoru aktu membru PNTL ne’e, maibé lamenta makaas ba espresaun violentu husi parte komunidade, no medida ne’ebé la adekuadu husi PNTL atu prevene eskalasaun violénsia, ne’ebé rezulta iha danos no estragus ba sasan no hela fatin husi família autór nian.
RENETIL apela ba komunidade tomak atu kalma no kontrola-an, no fó fiar ba autoridade polisia no instituisaun judisiária nian atu hala’o sira nia serbisu hodi harii justisa loloos iha kazu ne’e.
Akontesimentu ho fatalidade ne’e fó hanoin hikas akontesimentu seluk neébe mosu iha fulan Novembru 2018. Bainhira mosu akontesimentu iha 2018, RENETIL halo diálogu ho Komando Jeral PNTL nian, no identifika fatór balun ne’ebé bele sai hanesan kauza ba aktu membru PNTL ne’ebe komete aktu violentu, no medida saida maka Komando PNTL no governu presiza hola, atu garante katak akontesimentu sira ne’e la mosu tan iha futuru.
Nune’e RENETIL husu Komando PNTL atu kolabora ho Ministériu Públiku (MP) hodi hala’o investigasaun ida ne’ebe profundu, imparsiál no kredivel ba kazu ne’e, hodi kontinua ho julgamentu atu estabelese justisa
Ba Komando PNTL atu hala’o investigasaun ida kle’an ba sirkunstánsia pesoál hosi membru PNTL ne’ebe involve iha kazu ne’e hodi identifika kondisaun psikolójiku ka kauza seluk ruma ne’ebé lori nia ba komete aktu ne’e, hodi antesipa no evita akontesimentu hanesan iha futuru.
Implementa ho rijidu regras no prosedimentu ba check-out no check-in kilat ba membru PNTL, bainhira hahú no remata nia serbisu loro-loron, atu lalika lori kilat ba uma, bainhira la iha nesesidade serbisu nian, no aplika medidas disiplinares ne’ebé forte bainhira iha infrasaun ba regra sira neé
Ba Ministériu Interior no Komando PNTL atu estabelese mekanizmu hodi identifika problema psikolójiku ruma ne’ebe membru ruma hasoru, tanba trauma iha pasadu ka tanba presaun husi serbisu lor-loron, no hola medida atu apoia membru sira hodi rekupera, atu bele hala’o sira nia knaar didi’ak.
RENETIL kontinua pronto atu serbisu hamutuk ho instituisaun hotu-hotu no sosiedade tomak atu harii Timor-Leste ida ne’ebé dame, iha ne’ebé lei sira aplika loloos no iha justisa ba ema hotu.