Reportajen Zevonia Vieira
Akontesementu membru polisia tiru mate sidadaun nain 2 mate no nain ida kanek, hamosu reasaun barak hosi sidadaun, organizasaun no inklui grupu joven sira. Liu hosi komunikadu imprensa ne’ebe Neon Metin asesu, Alumni Parlamentu Foinsa’e Timor-Leste (APFTL) deklara katak asaun membru Polisia Nasional Timor-Leste (PNTL) la fo lisaun diak ba joven sira, nu’udar futuru nasaun.
APFTL kondena hahalok violentu ne’ebé komete husi membru PNTL, hodi tiru mate saudozu Filomenu de Deus ho nia oan mane Camilo de Deus, no mós hakanek saudozu nia mane foun Januario Pereira iha loron 5 Juñu 2021, suku Lahane Osidental.
APFTL hateten la satisfás ho membru PNTL sira, kontinua kaer kro’at estadu nian, hodi halakon sidadaun nia vida.
“Kazu hanesan ne’e la’os foin akontese, resente liu iha ita nia kakutak mak trajédia Kuluhun no asaun brutal sira seluk ne’ebé membru PNTL sira komete, nune’e APFTL konsidera asaun membru PNTL sira nian ne’e, atu sai hanesan fali tradisaun iha instituisaun PNTL nia laran, no la fo lisaun diak ba Joven sira nu’udar futuru hodi Lidera Instituisaun PNTL”, deklara APFTL iha komunikadu imprensa, 06/06.
Ho situasaun ida ne’e APFTL preokupa tebes aktu membru PNTL nian, ne’ebe la hatudu ezemplu no lisaun diak ba joven sira nu’udar Futuru Nasaun.
Sira rekomenda ba instituisaun PNTL atu toma responsabilidade ba família vítima nian hodi hetan justisa sosial.
Husu ba autoridade estadu atu halais prosesu justisa, hodi kondena membru PNTL ne’ebé oho sidadaun nain rua no hakanek sidadaun nain nain ida.
Husu ba governu atu halo teste psikolojia ba membru PNTL sira, hodi nune’e bele utiliza arma estadu nian ho responsabilidade.
APFTL mos husu ba komando PNTL atu kontrola no regulariza arma sira, liu-liu bandu membru PNTL atu labele hodi lori arma ba uma no lori arma movimentu tun-sae, bainhira la’os halao funsaun. Husu ba Primeiru Ministro, nu’udar mós Ministro Interior atu halo reforma iha Instituisaun PNTL.
APFTL mos hato’o sentidu kondolénsias profunda ba família enlutada no dejesu deskansa hakmatek ba saudozu Filomeno ho nia oan mane.
