Home Analisa PNTL Seidauk Hatudu ninia profesionalismu Atu Prevene no Kombate Violensia

PNTL Seidauk Hatudu ninia profesionalismu Atu Prevene no Kombate Violensia

892
0
hakerek nain Jemicarte Moniz dos Reis, Lic. AP. [Foto: Doc. privadu | 21.04.2021]

Hakerek nain Jemicarte Moniz dos Reis

Maske governu liu husi Konsellu Ministru estabelese ona enkuadrumentu legal ne’ebé adekuadu kona-ba regulamentu disiplinar, dekretu lei uza forsa nomos amenda rejimentu ba salariu iha instituisaun nomos realiza tiha ona programa kapasitasaun teknika no kuiñesimentu lei ho padraun internasional nian, liu husi koperasaun entidade oi-oin ne’ebé estabelese tiha ona. Dala barak membru forsa seguransa sira nian atuasaun la imparsial no sei toman halo reajen ho violasaun no uza arma arbitrariu ba konflitu ne’ebé akontese iha komunidade, duke provokativamente foti medidas prevensaun no serve aksaun judisiariu ho efetivu.

Bazeia ba observasaun asaun ilegal ne’ebé membru Oknum Polisia Nasional Timor-Leste halo iha tempu Estadu Emergensia mak hanesan halo agresaun fiziku hasoru sidadaun sira i sidadaun balun  balun hetan tiru kanek todan no balun mate iha fatin tanba asaun illegal ne’e komete husi Oknum Polisia Nasional Timor-Leste durante Estadu Emergensia (EE). Iha Dekretu Prezidente Repúblika N.o 24/2021, 28 Abril no Lei N.o 7/2021, 28 Abril ne’e klaru, katak iha artigu 6.o 1.b) no h) deklara katak Estadu Emergensia ne’e la afeta, iha kazu balun, entre direitu sira seluk, mak direitu ba integridade fiziku no direitu hodi la sujeita ba tratamentu ka kastigu krúel dezumanu ka degradante. Tuir termos husi artigus 9.o 23.o , no 30.o

Konstituisaun Repúblika Demokratika de Timor-Leste konsagra katak, Timor Leste vinkuladu hodi kumpri konvensaun sira ne’ebé ratifika ona nune’e intepretasaun tenke bazeia ba Deklarasaun Universal Direitus Umanus (DUDU) no ema hotu iha direitu ba moris, liberdade, seguransa, integridade pesoal no labele hetan tratamentu dezumanu no degradante. Konforme artigu 6.o no 7.o paktu internasional kona ba Direitus Sivis no Politikus, Ratifikadu husi rezolusaun parlamentu nasional N.o 3/2003, katak Estadu iha obrigasaun pozitiva hodi garante individus hotu-hotu nia direitu ba moris no hodi hetan tratamentu ho umana hodi evita tratamentu krúel, degradante no dezumanu.

Ezemplu hanesan kazu ne’ebé akontese iha Kuluhun, Tasi Tolu, Covalima, Likisa no inklui   Lahane Osidental, mesmu tipu kazu ne’ebé akontese la hanesan husu ba membru Polisia sira atu haktuir iha medidas ezekusaun ba Deklarasaun Estadu Emergensia (EE) mak estabelese iha artigu 21.o kona ba orgaun fiskalizadores ba kumprimentu medidas sira iha DG ida ne’ebé mak forsa no servisu seguransa ajentes vijilansia epidemiologika no sanitaria hodi fiskaliza kumprimentu ba ordem sira ne’ebé estabelse iha DG ne’e. Nune’e mos estabelese prinsipiu jerais ne’ebé orgaun fiskalizador sira tenke respeita durante implementasaun Estadu Emergensia (EE) ne’ebé preve iha artigu 3.o kona ba prinsipiu ba legalidade katak orgaun no servisu sira iha Administrasaun Públika responsavel ba aplikasaun medidas sira ne’ebé temi iha DG ida ne’e atu tuir deit Lei, tuir lemites poderes sira ne’ebé fó ba sira. Iha artigo 5.o n.o 2 no 3 ne’ebé estabelese prinsipiu proporsionalidade no nesesidade katak uza forsa hodi impoen kumprimentu ba regras Estadu Emergensia (EE) nia autoriza deit wainhira labele uza ona meius seluk no uza forsa sempre tau uluk mak intimasaun ba obedensia ne’ebé hala’o ho forma real no nesesariu iha medida ezijidu nain ba kumprimentu dever legal.

Husu ba forsa seguransa atu uza meius sira hanesan negosiasaun, mediasaun, persuasaun no rezolusaun ba konflitu iha terenu no bele uza deit forsa nato’on atu hamate risku ba ema seluk nia integridade fiziku ka moris wainhira medidas sira temi la-violentu durante konflitu esgotadu ona hanesan garante iha dekretu lei No 43/2011,21 setembru, rejime juridiku uza forsa.

Iha Sorin Seluk Seguransa Sira uza Armas Estadu ka Kilat la tuir Lei. Tuir Lei No 5/2017 iha artigu balun kolia kona ba uzus de forsa ninian. Iha lei hatetek katak uza forsa ne’e bainhira iha situasaun ne’ebé ejiji katak tenke uza duni forsa hanesan mos kilat i iha lei hirak ne’e kolia katak uza forsa ka uza kilat bainhira rekursu seluk la tahan, no iha ne’e ejiji ona katak tenke uza kilat. Maibé uza forsa ka uza kilat iha nia regras tiru bainhira iha duni nesesidade atu bele tiru, se bainhira naran tiru ne’e mos krime ida no ita nia lei kondena ho hahalok sira hanesan ne’e. Iha loron 5 Junho 2021 iha tuku ida kalan akontesimentu iha suku lahane osidental Munsipiu Dili Oknum membru polisia ida ho naran Inisial M tiru mate veteranus Mateus de Deus ho nia oan Camilio da Conceição de Deus mate iha fatin enkuantu joven ida sofre kanek todan. Matebian Mateus Deus hetan tiru husi Oknum Membru polisia ho pistol glock-19 bala musan kona iha hirus matan no Matebian Camilio da Conceição de Deus hetan tiru kona kabun hodi rezulta nia mos mate. Saida mak akontese ne’e ita lamentavel tebes ho hahalok Oknum membru polisia ne’ebé maka uza arma ka kilat povu nian atu proteje povu, maibé fila uza oho fali nia povu.

Asaun Sira ne’ebé mak Pesoal Oknum Polisia Sira  pratika Iha Implementasaun Estadu emergensia ne’e mos Viola ona Ita nia Konstituisaun  da Republika demokratika de Timor-Leste no Lei sira ne’ebé mak vigora iha ita nia rai no mos Lei Internsional Kona ba Deklarasaun Universal ba Direitus.

  1. Artigo 23 Interpretasaun Fundamental Sira iha K-RDTL.
  2. Artigo 29 Direitu ba Moris iha Konstituisaun RDTL.
  3. Artigo 30 Ema hotu iha direitu ba liverdade, seguransa no integridade pesoal iha Konstituisaun RDTL.
  4. Artigo 147 Polisia no forsa ba seguransa iha Konstituisaun RDTL.
  5. Lei Organica PNTL Numero 9/2009. Artigu 4 Uza Forsa.
  6. Lei Disiplinar PNTL 13/2004 No Dekretu Lei Nu 44/2020.
  7. Aleinde Konvensoens Internasional Timor-Leste Ratifika Kona ba Delkrasaun Universal Direitus Umanus. (DUDU).

Rekomendasaun

Atu Asegura Estadu Timor-Leste Sai nudar estadu de direitu demokratiku nomos hanesan estadu ne’ebé garante direitu ne’ebé hakerek iha konvensaun direitus umanus ne’ebé timor-leste ratifika tiha ona. Tuir mai hakark hato’o rekomendasaun ba entidades estadu sira atu konsidera hodi bele foti medidas tuir ida-idak nia kompotensia hodi bele hadia liu tan kondisaun direitu umanu povu nian iha futuru. Rekomendasaun espesiefiku kada asuntu ne’ebé identifika mak hanean tuir mai ne’e:

  1. Direitu ba Vida, Seguransa no Liverdade ba Integridade Fizika.

Husu ba Instituisaun PNTL:

  1. Aselera Investigasaun bainhira simu keixa no elegasaun ruma husi komunidade, kontra membru PNTL no foti medidas displina internal ho rigorozu ho transparansia no liu husi komunikasaun sosial, garante katak prosesu investigasaun criminal ba alegasaun hira atu lao ho efetivu, inklui mos aselerea prosesu investigasaun ba kazu alegasaun krime no disiplina iha periodu ida ne’e no ba futuru.
  2. Haforsa Liu tan implementasaun politika interna instituisaun nian relasiona ho sistema kontrolu arma/kilat no halo monitorizasaun regular ba membru PNTL sira hotu iha nivel nasional no mos municipal, nune’e bele halo kontrolu ne’ebé efetivu, no halo investigasaun kedas ho urjente no foti medidas ne’ebé adekuadu ba membru PNTL ne’ebé uza sala armas/kilat.
  3. Haforsa no fó apoiu liu tan servisu Departamentu Justisa iha komando PNTL iha Munisipiu inklui unidade investigasaun no VPU, nune’e sir abele halo sira nia funsaun diak liu tan iha future no dezenvolve liña koordenasaun ne’ebé fetivu iha instituisaun Judisiariu nian.

Husu ba Instituisaun PDHJ

  1. Instituisaun PDHJ Halo Prosesu Investigasaun ba Kazu Violasaun Direitus Umanus Refere.

Referensia

  1. Konstituisaun Republika Demokratika de Timor-Leste (RDTL) Vigor iha Loron 20 Fulan Maio 2002.
  2. Lei organika polísia nasionál timor-leste (PNTL) Dekretu -Lei n.º 09/2009, loron 18 fulan Marsu.
  3. Dekretu Prezidente Repúblika N.o 24/2021, 28 Abril no Lei N.o 7/2021, 28 Abril
  4. Lei Disiplinar PNTL 13/2004 No Dekretu Lei Nu 44/2020
  5. Konvensoens Internasional Timor-Leste Ratifika Kona ba Delkrasaun Universal Direitus Umanus. (DUDU).
  6. Konvensaun Internasional Kona ba Direitu Sivil no Politika.1976.
  7. Raimundos Oki Website: hattps://www.oekusipost.com

Print Friendly, PDF & Email

LEAVE A REPLY

Please enter your comment!
Please enter your name here