Reportajen Santina Lucia da Costa
Sekretáriu Estadu Komunikasaun Sosiál (SEKOMS) halo semináriu Internasionál ho tema “The Development of Global Digitalization and its impacts on Timor-Leste” no Seminar Internasionál refere hodi rona no aprende hosi peritu sira hosi rai liur no rai laran kona-ba oinsa atu uza plataforma dijitál ho di’ak.
Seminar ne’e ho objetivu atu fahe no diskute koñesimentu no esperiénsia husi oradór internasionál no nasionál sira ba progresu plataforma dijitalizasaun iha era modernu liuliu iha Timor-Leste kona-ba oinsa sensibiliza sosiedade Timor-Leste hodi akompaña loloos plataforma dijitál.
Iha Abertura Sekretáriu Estadu Komunikasaun Sosial (SEKOMS), Mericio Juvinal dos Reis “Akara” hateten to’o agora governu nia intensaun iha kometimentu nafatin katak, asegura garantia liberdade imprensa no liberdade espresaun, mantein kometimentu ida ne’e, tanba ita nia konstituisaun hateten duni nune’e, ita laiha hanoin atu bandu, ita laiha hanoin atu block kualker media iha Timor inklui plataforma dijitál.
SEKOMS haktuir Media hotu-hotu ne’ebé hakarak kontribui ba liberdade imprensa iha Timor, governu hakarak apoiu ida ne’e de’it, iha duni dinámiku balun tanba ita ninia sidadaun balun seidauk iha koñesimentu kle’an, seidauk iha intelijénsia forte maka’as atu uza media, maibé ne’e laos ita nia sidadaun sira nia sala de’it ne’e estadu, governu mos tenke asume responsabilidade, tanba estadu liu husi governu iha responsabilidade atu prepara ninia sidadaun para sai matenek ba intelijénsia hodi tama iha era-dijitál para hodi uza media.
“Tanba ne’e maka, prosesu ida ne’e tenke kontinua, labele fó sala ba malu bainhira fallansu balun akontese ema uza sala plataforma dijitál ka media konvensionál sira, hau hanoin prosesu ida ne’e tenki hadia beibeik de’it, ita labele ses fali prinsipiu garantia liberdade imprensa”, hateten, Mericio Juvinal dos Reis “Akara” iha Abertura Seminar Internasional, iha Salaun Suai Room, Timor Plaza, 7/7.
Akara afirma savi ida husi liberdade imprensa maka independensia editórial, kualker intervensaun politika labele tama iha independensia editorial ka labele iha intervensaun polítika iha redasaun, inklui media estadu sira hotu, karik bele fó edukasaun jeral tanba lei dehan, maibé labele halo intervensaun direitu independensia editorial.
No nune’e, seminar ne’e ho eskala internasionál maka orador na’in rua jornalista Internasional husi Portugal mak hanesan Sandra Ferreira ho Carina Valéria, fahe sira nia esperiénsia no koñesimentu kona-ba plataforma dijitál iha mundu global hanesan Digital Literacy, fake news, no safety internet. Orador nasional sira mak hanesan Dr. Jose Ramos Horta, Prezidente Konsellu Imprensa, Virgilio Guterres no Padre Bento Barros Pereira koalia kona-ba plataforma dijitál iha kontestu nasional Timor-Leste.
Enkuantu Sekretariu Estadu Komunikasaun Sosial, Mericio Juvinal dos Reis “Akara” hanesan na’in ba seminar sei koalia kona-ba politika VIII governu Konstituisional ba dezenvolvimentu plataforma dijital no oinsa sosiedade Timor-Leste bele adapta-an.