Reportajen Santina Lucia da Costa
Sekretáriu Estadu Komunikasaun Sosial (SEKOMS), Mericio Juvinal dos Reis Akara hateten populasaun Timor-Leste 45 % mak uza ona internet, ativu iha media sosial 33.1% katak populasaun kuaze 440 mill mak ativu ona iha media social.
“Ba Timor-Leste era dijitál iha 2021 ita nia populasaun tuir survey katak 1.33 Million, ema ne’ebé iha ona telefone hamutuk 1.46 liu fali populasaun bele sala, maibé bele mós iha razaun tanba agora ema ida ne’e iha telefone ida ka rua, ema uza internet kuaze metade ema populasaun Timor-Leste 45 % mak uza ona internet, ativu iha media sosiál 33.1%, populasaun kuaze 440 mill mak ativu ona iha media sosiál.” informa SEKOMS Mericio Juvinal dos Reis “Akara” iha salaun Suai Room, Timor Plaza, 7/7.
Mericio Juvinal dos Reis Akara hatutan iha dadus balun dehan, ita iha Timor maioria joven kuaze 50-60% mak ativu laos justifika dadus ida ne’e, mais iha razaun. Ninia tendensia sae ka tun iha populasaun kada tinan numeru populasaun nafatin sae +1.9%, numeru uza mobile sae ba +0.4% ema uza internet sae tan ba +16.4% no ema ativu uza media sosial ne’e +7.3%.
Nia dehan governu hakarak prepara sidadaun atu tama iha era dijital, presija promove edukasaun sivika, promove literasia dijital, para ita nia sidadaun hahu akompaña para aprende oinsa uza plataforma dijital ne’e ho matenek, intelijensia, tanba era dijital ne’e lori pozitivu ho negativu mai hotu.
“Ita iha responsabilidade prepara ita nia sidadaun, dalan mak liuhusi kampaña nasional, promove internet saudavel, kontinua kampaña nasional kontra hoax ka desinformasaun sira no kolabora ho ita nia parseiru hotu-hotu, inklui media, para kontinua halo edukasaun sivika iha ida-idak ninia knar,”dehan Akara.
Nia konklui katak seminar sira hanesan ne’e, atu provoka diskusaun oinsa kada pilar ida-idak, instituisaun ida-idak kontribui ba edukasaun sivika, media nia kontribuisaun maka kontinua fo informasaun loos no kredivel, antes hato’o informasaun tenki verifika.
