Reportajen David da Costa Gusmao
Konfederasaun Desportu Timor-Leste (CDTL) Munisípiu Manufahi to’o agora seidauk iha fasilidade desportu nian, inklui rekursu umanus ne’ebé mak la sufisiente no laiha atividade desportu nian.
Tuir Pontu Fokal Konfederasaun Desportu Timor-Leste (CDTL) Munisipiu Manufahi, Fransisco da Costa hateten durante pontu fokal hala’o nia kna’ar iha konfederasaun futeból Timor-Leste, hala’o nia kna’ar husi serbisu sira nian hotu, ho ida ne’e husi parte konfederasaun nia hare liu ba polítika konfederasaun nian ne’ebe sira hala’o ona, maibe to’o agora sira sei preokupa hela ho fasilidade desportu nian.
“Ita sei enfrenta hela fasilidade desportu nian iha Munisípiu Manufahi, inklui mós ita nia rekursu umanus la sufisiente, ita nia atividade desportu laiha, tanba ne’e mak ita hato’o ona ba governu liu husi SEJD atu nune’e bele tau mos prioridade ba ita nia preokupasaun sira ne’e,” Nia dehan iha salaun Administradór munisípiu Manufahi, Kuarta 11/08.
Iha tempu hanesan Sekretariu Estadu Joventude no Desportu (SEJD) halo diálogu ho CDTL iha Munisipiu Manufahi hodi rona sira nia preokupasaun sira, nune’e bele buka solusaun.
“Ita presiza tun ba iha baze, hodi bele hatene situasaun ne’ebé akontese iha nivel baze. Tanba durante ne’e ita iha Dili de’it, ohin ne’e ita tun mai iha ne’e hodi rona preokupasaun hosi sira nia Prezidente,” informa nia.
Nia relata informasaun sira ne’ebe sira hato’o mak konaba fasilidade desportu no rekursu umanus, tanba durante ne’e treinadór sira iha nivel baze seidauk barak, arbitu no juri sira iha nivel kraik seidauk barak, presiza fo formasaun tan, preokupasaun sira ne’e bele ajuda SEJD atu halo planu no bele halo asaun ruma.
“Ita sei foti asaun atu halo formasaun ba rekursu umanus iha futeból, Voleiból, Basketeból, atletizmu, arbitu no treinadór,” nia promete.
Nia salienta tan, ba iha preokupasaun seluk presiza tur hamutuk ho asosiasaun federasaun sira iha Dili, oinsa bele halo planu tau orsamentu ba iha tinan oin nian.