Reportajen David da Costa Gusmao
Organizasaun Artemarsiais (OAM) Korka, Iks, PSHT, Arterituais sira seluk iha Manufahi husu governu liu husi Sekretáriu Estadu juventude no Desportu (SEJD) atu reativa fali arte marsiais iha Manufahi.
Koordenador Artemarsiais IKS iha Manufahi, Mario da Costa Mendonça hato’o sira nia preokupasaun ba Sekretáriu Estadu juventude no Desportu (SEJD) atu reativa fali Artemarsiais sira iha Timor-Leste.
“SEJD buka meius oinsa atu bele reativa fali artemarsiais sira iha Timor-Leste, para organizasaun ne’e bele halo atividade fali, no bele halo kooperasaun ho estadu no KRAM, karik mosu problema ruma ami bele kontrola ami nia ema no mos estadu bele kontrola,” dehan Koordenadór IKS Manufahi, bainhira hasoru malu ho SEJD iha Salaun Administradór Manufahi, Kuarta 11/08.
Iha fatin hanesan, Koordenadór Artemarsiais Korka Manufahi, Leopoldino da Costa Mendes hateten, dala-barak organizasaun artemarsiais sira enkontru ho prezidente KRAM, oinsá atu reativa artemarsiais ne’ebe mak taka durante ne’e.
Nia mos hato’o nia lamentasaun, dala-barak juventude sira ne’ebe hola parte iha artemarsiais, dala ruma sira halo problema, maibé problema ne’e individual, maibe dala-ruma media ho seguransa sira mak transforma problema ne’e sai fali problema artemarsiais.
Hatan ba prekupasaun ne’e, Sekretariu Estadu Juventude no Desportu (SEJD), Abrão Saldanha Nokosiku hateten, organizasaun artemarsiais Manufahi husu atu reativa fali artemarsiais, tanba bainhira iha problema ruma ema sempre dun ba sira, dehan sira mak halo problema ne’e.
“Governu kompremitidu ona atu reativa fali artemarsiais, agora ne’e prosesu lao hela iha nasionál, governu hasai ona kritériu bolu diretiva ba KRAM iha 18, sira kumpri ona ida ne’e, no governu sei rekomenda ba Ministériu Justisa atu reatualiza no rejistu fali sira ne’ebe mak presiza”, nia dehan.