Reportajen Adroaldo ‘Saretukau’
Komunidade aldeia Ulmanlaun ho Maubouk, Suku Fatisi, Postu Administrativu Laulara, Munisípiu Aileu, seidauk asesu eletrisidade, maski Eletrisidade de Timor-Leste (EDTL) harii hela besi riin maibé seidauk instala ahi.
Tuir komunidade Amélia da Conceição katak sira la asesu eletrisidade, sira uza de’it ahi tradisionál no lilin, ida ne’e halo sira gasta osan barak liu durante ne’e.
“Ami sunu lilin, lilin ne’e ami gasta osan liu, sunu ba mohu lalais. Bainhira osan la iha sosa lilin, ami hili kamí mai hanesan uluk nian, ami tuku tiha, ami fai ho ai-lele, ami bobar ba ai ne’e para ami sunu. Ne’e sunu para han de’it, han hotu toba, buat ne’e mohu ona” hateten Amélia ba Neon Metin iha Suku Fatisi 26/08.
Iha parte sorin Xefe Suku Fatisi, Duarte do Rosário informa katak, komunidade iha suku refere maioria la asesu ba eletrisidade tanba Eletrisidade de Timor-Leste (EDTL), harii ona besi rin maibé seidauk instala ahi to’o oras ne’e.
“Iha suku Fatisi ahi tama ona maibé komunidade rasik mak sosa fiu, hodi dada ba sira nia uma, la’os EDTL mak dada. Ida ne’e komu kompañia harii hela riin, la hatún ahi ba uma, komunidade sira esforsu hodi sosa rasik fiu, komunidade sira asesu ahi maibé sei ilegál tanba ida-idak mak dada hela” hateten Xefe Suku Duarte iha Fatisi 26/08.
Total populasaun iha suku Fatisi iha nain 800 liu, ho uma kain 100 resin, hosi aldeia tolu ne’ebé eziste iha suku ne’ebá, iha aldeia ida de’it mak asesu eletrisidade. Komunidade ne’ebé besik estrada ibun mak asesu hela eletrisidade, maibé aldeia ne’ebé ho distánsia dook hosi estrada labele asesu, tanba kondisaun jeográfika la hanesan.
“Aldeia Banru besik sede suku no estrada boot tanba ne’e sira asesu ba ahi, Ulmanlaun ho Maubouk mak seidauk asesu ba eletrisidade”, heteten Duarte.
