Reportajen Juvinal Cabral dos Santos
SEI organiza Forum diálogu ho Xefe Suku 452 kona-ba papél Xefe Suku ba iha igualdade jéneru no inkluzaun sosiál, diálogu ho tema autoridade lokál sai kampiaun ba igualdade jéneru iha suku.
Liuhusi dialogu ne’ebe Sekretariu Estadu ba Igualdade (SEI), Elvina Sousa Carvalo informa ba Xefe Suku sira konaba knaar importante hodi fasilita no tranzmite informasaun sira ba mudansa iha komunidade nia laran.
“Ita boot sira mak sei kria inisiativa mudansa norma sosiál pozitivu sira ne’ebé valoriza feto, labarik feto, valoriza direitu feto no mane iha suku laran tratamentu ne’ebé hanesan feto, mane, ema ho defisiénsia no komunidade LGBTQ” dehan Sekretaria Estado Elvina Sousa Carvalho iha Salaun Oka 18/07/2024.
Nia dehan ema ne’ebe sai kampiaun ba igualdade jéneru sei dedika an, atu inisia atividade sira hodi harahun barreira ne’ebé teri netik feto sira nia oportunidade, dezafia estereótipu jéneru no kria inisiativa ba partisipasaun iha polítika no kbiit ekonomia feto rural.
Elvina rekoñese kontribuisaun Xefe Suku sira ne’ebé harii paz iha komunidade nia laran, knaar importante sira ne’ebé autoridade suku sira iha hatuur ona iha lei suku númeru 9/2016, no 23 Kona ba Xefe Suku nia kompeténsia atu kria mekanizmu prevensaun violénsia doméstika no kria inisiativa profisaun atu akompaña vítima sira. Iha parte seluk lei kontra violénsia doméstika mos fo oportunidade ba Xefe Suku no Xefe Aldeia sira atu fahe informasaun kona ba lei nian.
“Iha Planu Asaun Nasional kontra violensia bazeia ba jeneru iha 2022 no 2032 mos sita ita boot sira nia knaar iha prevensaun violénsia bazeia ba jeneru iha suku, no fo responsabilidade ba Ministériu Administrasaun Estatal atu hasae kapasidade autoridade lokál liu hosi formasaun no kapasitasaun oioin”
Iha Fatin hanesan Xefe Suku Bualale Postu administrativu Quelicai munisipiu Baukau, Gabriela Belo da Conseicao dehan igualdade jéneru ne’e implementa iha suku, no problema saida de’it mak akontese iha aldeia ka suku sira, membru konsellu suku tur hamutuk rezolve hodi kria nafatin unidade no paz iha sira nia suku
Xefe Suku ne’e haktuir iha nia suku, feto mos tuir teste ba administrasaun suku, maibe la liu, mane deit mak liu, maske servisu hamutuk feto ho mane direitu hanesan no enkontru ruma iha suku sempre envolve feto no mane hotu
“Iha ami nia suku rejistu kazu kona violénsia bazeia ba jéneru maibe hanesan problema ki’ikoan Uma laran feto no mane ne’e ami rezolve de’it iha aldeia la to’o iha suku”
