Reportajen Santina Lucia da Costa
Prezidente Tribunal Rekursu (PTR), Deolindo dos Santos relata Tribunal Rekursu halo Preparativus ba Implementasaun lei organizasaun Judisiariu foun ba Prezidente Republika (PR), Francisco Guterres Lú Olo.
Aprovasaun no promulgasaun lei Organizasaun Judisiariu nian halo tanba haree ba nesesidade Timor-Leste nian atu bele fó liu tan justisa ba nia povu, hafoin UNTAET estabelese organizasaun judisiariu iha territoriu iha tinan 2000.
Lei ne’e fó kbiit ba estadu atu kria kondisoins sira hodi harii Tribunais ne’ebé haktuir iha konstituisaun, hanesan supremu tribunal justisa previstu iha artigu124 Konstituisaun Republika.
“Ha’u hato’o ba Prezidente Republika kona-ba preparasaun parte konsellu nian atu haree ba implementasaun lei organizasaun orgaun judisiáriu foun ne’ebé Parlamentu Nasionál aprova no Prezidente Repúblika promulga ona entrada em vigor ona, kestaun hirak ne’ebé ligadu ho tékniku ami halo nusa atu bele servisu hamutuk ho orgaun kompetente sira atu bele fó resposta ne’ebé di’ak no lalais liu tan ba lei foun ne’ebé iha ona.” Hateten, Prezidente Tribunal Rekursu, Deolindo dos Santos ba Jornalista sira iha Palasiu Prezidensial Nicolau Lobato, Bairu-Pite, 28/3.
Lei Organizasaun Judisiariu, promulga iha loron 1 Dezembru 2021 no Publika iha Jornal Republika iha loron 2 Dezembru.
Aleinde ida ne’e, Prezidente Tribunal Rekursu, Relata mós serbisu Tribunál nian la’o ho forma ne’ebé regular, mezmu difikuldade ne’ebé hasoru maibé la’o ho forma ne’ebé di’ak liu tan, tanba esforsu ne’ebé halo hamutuk ho kolega ho juis sira ne’e ho indikasaun prosesu ne’ebé iha kuaze la’o ho forma normál mezmu iha fatin balun ne’ebé sei iha difikuldade ki’ik oan, maibé ita tenta nafatin atu fó solusaun ne’ebé di’ak ba serBisu Tribunál nian.
