“Projetu Tasi Mane iha hela inserteza nia laran. La iha razaun atu aloka osan ba dezlokasaun komunidade se viabilidade projetu ne’e seidauk klaru. Presiza prioritiza estudu independente kona ba kustu, benefísiu, no risku molok aloka osan tan ba implementasaun”, Lao Hamutuk hatete iha nia Komunikadu Imprensa (25/05).
Lao Hamutuk publika iha ninia Komunikadu Imprensa horiseik (25/05) kontiudu hosi ninia Karta Aberta ne’ebe hato’o mos katak programa balun ne’ebé Lao Hamutuk konsidera la bele sai prioridade iha OJE 2023, inklui aeroportu regional sira no komponente Projetu Tasi Mane.
“Ezbosu lei Grande Opsaun inklui “aquisição de terrenos e reassentamento da população”, maibé Projetu Tasi Mane iha hela inserteza. La iha razaun atu aloka osan ba dezlokasaun komunidade se viabilidade projetu ne’e seidauk klaru. Presiza prioritiza estudu independente kona ba kustu, benefísiu, no risku molok aloka osan tan ba implementasaun, hanesan ANPM no TimorGAP fó kometimentu atu realiza”, Lao Hamutuk esplika iha nia komunike laran.
Lao Hamutuk mos hatutan dehan, proposta Lei ida ne’e mós inklui estensaun auto-estrada iha Costa Súl ne’ebé liga ho Projetu Tasi Mane. Konstrusaun faze primeiru realiza ho kustu tokon $350 ba 30 km de’it – ho kualidade ne’ebé la di’ak no daudaun ne’e kondisaun balu hahú aat ona. Se Governu propoin atu kontinua harii auto-estrada ida ne’e, karik kustu tomak bele to’o $1.3 biliaun – maske estudu independente ba projetu ida ne’e seidauk hala’o. Mosu dúvida boot, benefísiu saida mak sei fó ba povu, no oinsá mak impaktu ba sustentabilidade finanseiru?
Komunikadu Imprensa Lao hamutuk nian esplika liliu Karta Aberta ne’ebe Lao Hamutuk hato’o ba deptadu/a sira iha 24 Maiu 2022. Halo ida ne’e, La’o Hamutuk hakarak atu kontribui ba avaliasaun no diskusaun ba dezeñu diresaun Polítiku ida ne’ebé realistíku, ekitável no sustentável liu.
