Reportajen David da Costa Gusmao
Ministeriu Saude (MS) liu husi Sala Situasaun Sentru Integradu Jestaun Krize (SS-CIJK) ohin rejista tan timoroan na’in 2 mate ho Covid-19 iha izolamentu Vera Cruz no Lahene, nune’e kazu óbitu sae ba 64, no kazu foun konfirmandu COVID-19 ohin hamutuk ema nain 113.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, informa ohin loron 30 Agostu, deteta kazu foun hamutuk ema nain 113, iha Dili nain 66, Baucau nain 32, Covalima nain 2, Ainaro nain 2, Bobonaro nain 5, Ermera nain 1, RAEOA nain 5 no munisipiu sira seluk ne’e ohin laiha kazu.
“Husi total kazu detetadu foun ohin ne’e mane 58 no feto 55, husi kazu foun hirak ho idade tinan 20 nain 27 (23,8%); ho idade entre tinan 12-59 nain 82 (72,5%), ho idade 60 nain 4 no husi total kazu detetadu ohin, 61 kazus ka 54,% mak asintomátiku ou hatudu sintomas,” Dr. Rui esplika liu hosi komunikadu imprensa ne’ebe Neon Metin asesu iha loron, Segunda 30/08.
Nia haktuir husi kazu detetadu foun ohin 17 (15%) iha ona vasina kompletu, no 13 (12%) hetan ona vasina doze dahuluk.
Kazu rekuperadu ba loron 30 Agostu hamutuk nain 91, kazu ativu ohin hamutuk nain 4,574 no total kazu konfirmandu kumulativu sura husi 21 Marsu 2020 to’o ohin loron hamutuk 16.515.
Ba kazu obitu feto idade 73 timoroan, hela iha Ainaro, seiduak vasina, iha 27 Agostu 2021 diagnostikadu iha Ainaro ho sindroma insufisiénsia respiratória aguda (SIRA), tanbá Covid-19 no iha loron ne’e kedas matebian hala’o tratamentu iha Lahane tuir protokolu neebé iha. Matebian iis-kotu ohin madrugada iha oras 01:44, tanbá respiratoric failure/parajen respiratória.
Kazu obitu seluk feto ho idade 83 timoroan, hela iha Dili, sedauk vasina kompletu, iha 22 Agostu 2021 diagnóstikadu iha HNGV ho sindroma insufisiénsia respiratória aguda (SIRA) tanbá Covid-19 no iha loron ne’e kedas matebian hala’o tratamentu iha Vera Cruz tuir protokolu ne’ebé iha. Matebian sofre mós problema fuan. Matebian iis-kotu ohin dader 10”55, tan bá respiratoric failure/parajen respiratória.