Reportajen Joselina dos Santos
Centro Nasional Chega! (CNC) ho Komité Orientadór 25 asina Nota Entendimentu ne’ebe foka ba kooperasaun akadémika, sientífika no partilla rezultadu peskiza, hodi hasae kapasidade entre instituisaun refere.
Liuhusi konferénsia imprensa, Diretór Ezekutivu CNC, Hugo Fernandes hateten katak Chega ho Committee Orientadór 25 nu’udar meiu ida hodi iha transparénsia, kontabilidade Públiku ba fiar ne’ebé mak estadu no Governu fo ba instituisaun rua ne’e.
Nia dehan objetivu husi Nota Entendimentu ne’e atu hametin kapasidade instituisaun rua nian, tanba estadu mak harii ho nia natureza jurídiku servisu ne’ebé mak espesífiku ba Centro Chega! ho mandatu ne’ebe dekretu lei iha,” dehan Diretór Ezekutivu CNC liuhusi konferénsia imprensa iha Salaun Enkontru CNC Balide, (28/09/2021).
Nia dehan CNC nia luta ba ukun rasik-aan iha dimensaun oin-oin hanesan polítika no violasaun direitus umanus.
“Ami hetan eransa husi Servisu Komisaun Apoiamentu Verdade Rekonsiliasaun ho millares de Dokumentu arkivu kona-ba ema nia memória no arkivu kona-ba ema nia partisipasaun instituisaun sira nian, ba joven organizasaun rezisténsia sira, no mos arkivu sira kona-ba komunidade internasionál nia envolvimentu iha Timor”, tenik nia
Hugo Fernandes mos informa katak tinan oin CNC sei estabelese Centro arkivu foun modernu oituan ho dijitalizasaun, atu bele fahe rekursu sira ne’e hamutuk no bele rai hamutuk dokumentu no memória pasadu sira ho seguru, no asesivel ba nasaun ida ne’e.
Iha fatin hanesan Prezidente Komité Orientadór 25, Constâncio da C. Pinto “Terus” haktuir Committee Orientadór 25 mos iha instituisaun foun ne’ebé kria iha tinan 2017, liu husi rezolusaun Konsellu Ministru, mai ho kna’ar espesífiku atu hakerek istória partisipasaun juventude iha luta ba ukun rasik-an nian.