Reportajen Francisco JDA
Governu liuhusi Ministériu Saude iha planu atu halo vasinasaun ba dose datoluk, hare ba nasaun seluk ne’ebe implementa ona vasinasaun ba doze datoluk ba sira nia sidadaun.
Informasaun ne’e hato’o husi Ministra Saude, Dra. Odete Belo ba jornalista katak Timor-Leste sei implementa vasina ba datoluk nian, maibe sei fo prioridade liu ba frontline no ema ne’ebe vulnerable tebes tanba iha moras seluk
“Atu hahú vasina terseiru doze, ema hotu tenke kompleta lai vasina primeiru no segundu doze, nune’e mós Ministériu saúde (MS) nafatin koordena ho Organizasaun Saúde Mundiál ( OMS) atu bele rona informasaun sira”, dehan Ministra Saude iha Parlamentu Nasional, 28/09.
Liuhusi debate iha uma fukun Parlamentu Nasional hodi diskuti konaba estensaun Estadu Emerjensia (EE) ba dala 18, nune Ministra Saude dehan introdusaun vasina inklui terseiru doze sei la fo ba ema hotu, maibe sei fo deit ba linha frente ka frontline no ema nebe vulnerable liu
“Ita nafatin fó atensaun ba terseiru doze ba liña frente no sira ne’ebé mak vulneravel tebes, atu bele hetan terseiru doze ne’e” hatete Ministra Saúde.
Ministra Saúde dehan atu simu terseiru doze depende ba nasaun nia disponibilidade orsamentu ba vasina, maibé ida ne’e mós ema presiza kompleta lai vasina primeiru no segundu doze, nune’e mós presiza asegura uluk lai primeiru no segundu doze, hafoin mak bele ko’alia kona ba terseiru doze.
