Reortajen David da Costa
Relasiona ho Ministériu Públiku (MP) ne’ebé maka halo notifikasaun ba Jornalista Rogério Pereira Carceres ho nia Xefe Redasaun, Francisco Ximoés Belo da Costa no Media Diligente hetan ameasa husi eis-seminarista no superiór sira Semináriu Minor Nosa Señora de Fatima (SENOFA), Asosiasaun Jornalista Timor Lorosa’e (AJTL) Konsidera ne’e aktu tentativa no ameasa hasoru liberdade imprensa no espresaun no impede no hatauk jornalista no mídia atu hato’o informasaun kona-ba violasaun direitu umanu, transparénsia no kontabilidade ne’ebé parte ida husi prinsípiu boa governasaun no valór demokrasia nian.
Portavoz Asosiasaun Jornalista Timor Lorosa’e (AJTL), Acasio Pinto, hateten, Nu’udar resposta ba Ministériu Públiku nia notifikasaun hasoru Jornalista Hatutan.com, Rogério Pereira Carceres ho nia Xefe Redasaun, Francisco Ximoés Belo da Costa relasiona ho Hatutan.com nia publikasaun notísia kona-ba Prokuadór Jerál (PGR), Alfonso Lopes ne’ebé deskonfia uza Estadu nia osan hodi halo viajen privadu ba Lisboa – Portugal no ameasa husi eis-seminarista no superiór sira Semináriu Minor Nosa Señora de Fatima (SENOFA) nian foin dadauk ne’e relasiona ho Mídia Online Diligente nia notísia kona-ba deskonfia “maus-tratus, agresaun no fornesimentu hahan ladi’ak” ne’ebé akontese iha SENOFA,
“AJTL haree katak aktu hirak ne’e la reflete valór sira demokrasia nian no la reflete prinsípiu direitu demokrátiku ne’ebé Timor-Leste opta nu’udar filosofia moris país nian tamba ida-ne’e impede no hatauk jornalista no mídia atu hato’o informasaun kona-ba violasaun direitu umanu, transparénsia no kontabilidade ne’ebé parte ida husi prinsípiu boa governasaun no valór demokrasia nian,” dehan Portavoz AJTL, Acasio Pinto, Liuhusi Konferenisa Imprensa iha Sede AJTL fatuhada, Tersa 27/06.
Tanba haree aktu legál ne’ebé Ministériu Públiku foti hasoru Hatutan.com no SENOFA nia ameasa hasoru Mídia Online Diligente nu’udar aktu tentativa no ameasa hasoru liberdade imprensa no liberdade espresaun iha país demokrátiku ida-ne’e no aktu hirak ne’e sei afeita index ranking liberdade imprensa TOP 10 (top ten) ne’ebé Timor-Leste dadauk ne’e atinji. Notifikasaun no ameasa hasoru jornalista no mídia iha país demokrátiku ida-ne’e la’ós dalan demokrátiku tamba notisia sira ne’ebé Hatutan.com no Diligente publika nu’udar produtu jornalístiku, la’ós aktu krime no ida-ne’e nu’udar parte ida husi papél mídia kontrolu sosiál hodi hakunu sidadaun sira nia direitu atu asesu informasaun loos no kredivél kona-ba transparénsia, kontabilidade no direitu umanu.
Ho ida ne’e, AJTL konsidera katak Hatutan.com nia notísia kona-ba PGR, Alfonso Lopes tuir ona prinsípiu jornalizmu universál, boa prátika (good practices), Kódigu Étika Jornalizmu, prinsípiu prezunsaun inosénsia no Lei Komunikasaun Sosál tamba antes ne’e Hatutan.com publika ona PGR nia direitu resposta. Nune’e mós Mídia Online Diligente nia notísia, Diligente nia notísia kona-ba deskonfia maus-tratus, agresaun no fornesimentu hahan ladi’ak iha SENOFA tuir ona prinsípiu jornalizmu universál no Kódigu Étika Jornalizmu tamba antes ne’e Redasaun Diligente esforsu ona hodi halo konfirmasaun liuhusi karta, telefone no meiu sira seluk, maibé jestór no superiór SENOFA rejeita Diligente nia pedidu konfirmasaun. Diligente nia notísia ho fonte anónimu ne’e nu’udar fonte kredivel no ida-ne’e sujetu ba Kódigu Étika Jornalístiku Pontu 4 hodi kumpri komprimisu konfidensialidade ho fonte informasaun sira.
“AJTL kontra no kondena notifikasun husi Ministériu Públiku ne’ebé dirije hasoru Jornalista Hatutan.com, Rogerio Pereira Carceres no Xefe Redasaun Hatutan.com, Francisco Simoés Belo da Costa tamba aktu ida-ne’e sei hatauk jornalista no mídia atu halo reportajen investigativu ne’ebé iha ligasaun ho aktu korupsaun sira sira iha futuru,” nia dehan.
Tanba ne’e, AJTL konsidera Ministériu Públiku nia notifikasaun ida-ne’e nu’udar defeze ba no aktu ignoránsia ba hahalok ne’ebé tuir loloos kontra lei no prinsípiu boa governasaun iha país demokrátiku Timor-Leste. Ho ida ne’e, AJTL mós sei halo karta ba Sua Exelensia Prezidente Républika, José Ramos Horta nu’udar mós laureadu Nobel da Paz, tamba Ministériu Públiku nia notifikasaun ameasa dadauk ona liberdade imprensa no liberdade espresaun iha ambitu Timor-Leste halo preparasaun atu tama iha ASEAN iha tinan ida-ne’e.
“AJTL respeita eis-seminarista sira, Jestór no superiór sira SENOFA nia pozisaun kona-ba Mídia Online Diligente nia notísia, maibé aktu ameasa atu lori Mídia Diligente ba tribunál la’ós dalan propriu no la’ós meiu demokrátiku atu solusiona problema ne’ebé liga ho publikasaun notísia tamba produtu jornalístiku la’ós krime,” nia esplika.
