Reportajen David da Costa
Liuhusi Konsellu Ministru (KM) Governu nomea Superintendente-Xefe Henrique da Costa atu ezerse kargu Komandante-Jerál Polísia Nasionál Timor-Leste (PNTL), hodi promove ba Komisáriu-Jerál.
Porta Voz Governu, Ministru Prezidénsia Konsellu Ministru Fidélis Mangalhães, hateten,ohin aprova projetu Rezolusaun Governu, aprezenta husi Ministru Interiór (MI) Taur Matan Ruak kona-ba nomeasaun ba Superintendente Xefe Henrique da Costa atu ezerse kargu Komandante-Jerál Polísia Nasionál Timor-Leste (PNTL), ba períodu tinan tolu, tanba ne’e, promove ba Komisáriu-Jerál.
Ho Rezolusaun ida-ne’e atu hapara komisaun servisu atuál komandante-Jerál PNTL, komisáriu Faustino da Costa.
“Nomeasaun ne’e bazeia ba lei, tanba lei ko’alia klaru kona-ba rekizitu sira, senioridade sira, grau sira ne’ebé maka bele hatudu sira nia performance sira,”dehan Ministru Prezidénsia Konsellu Ministru Fidélis Mangalhães, iha palásiu governu,15//03.
Alende ne’e mós Konsellu Ministru aprova projetu Rezolusaun Governu, ne’ebé mós aprezenta husi Ministru Interiór hodi nomea Superintendente Xefe Pedro Belo atu ezerse kargu Segundu Komandante-Jerál PNTL, ba períodu tinan tolu, ho nune´e promove ba Komisáriu.
Ho rezolusaun governu nian ida-ne’e, hapara mós komisaun servisu Komisáriu Mateus Fernandes.
Iha parte sorin Vise Ministru Interiór, António Armindo hateten tuir Ajenda Primeiru Ministru Taur Matan Ruak, hanesan Ministru Interiór hatama ajenda ba iha Komandante Jerál foun, atu substitui Komandante Jerál atuál, tuir lei orgánika artigu 25 aliña 2 proposta Ministru Interiór, no aprovadu ona iha nomeasaun Komandante Jerál nain rua maka Superintendente Xefe Henrique da Costa no Superintendente Xefe Pedro Belo.
Nia hatutan kona-ba tomada depose ba sira nain rua preparasaun lao ona, tanba Komandu maka sai komisaun hodi halo preparasaun ba ida ne’e, portantu planu Ministru no komandu nian sei halo tomada depose iha 27 Marsu agora, iha loron tempu Aniversáriu PNTL nian.
