Reportajen David da Costa Gusmao
Komandante Polisia munisípiu Manufahi, Superintendente Polísia, Joni Viana das Regras deklara vizita traballu husi Prezidente Repúblika, liuhusi Polísia Nasional Timor-Leste (PNTL) Manufahi hamutuk ho komandante postu Betanu ne’ebé mai husi komponente naval, garantia seguransa di’ak no seguru durante loron rua.
“Ita tenke garantia seguransa, tanba ne’e nai ulun boot estadu nian, nai ulun boot Timor-Leste, hanesan seguransa, hanesan instrumentu estadu, organ estadu tenke garantia seguransa ne’ebé mak di’ak ba ita-nia sua eselensia Prezidente RDTL hamutuk ho entidades hothotu, administrador, ho kamadas hothotu ne’ebé pertense iha rai Manufahi, tenke hamutuk garantia estabilidade ba sua eselensia Prezidente RDTL”,dehan nia iha Lesuati, baliza entre Manufahi ho Ainaro, tersa (16/10).
Nia haktuir PNTL iha planu ida ke feitu e ajusta mós ho planu nasionál, para oinsá garantia seguransa ida ne’ebé di’ak, seguru ba Prezidente RDTL ho komitiva
“Portantu iha eventu ida ne’e ita hatun efetivu porvolta 101 atu bele fó seguransa ne’ebé di’ak, seguru ba ita-nia sua eselensia Prezidente Repúblika ho komitiva durante loron ida ohin ate 18 dezloka ba munisípiu Ainaro”, esplika nia.
Enkuantu membru PNTL ho FDTL hamutuk na’in-101 ne’e kompostu husi Forsa Defeza Timor-Leste (FDTL) no iha estimasaun hamutuk ho postu FDTL Betano, ne’ebé mai husi komponente naval porvolta iha 30 e iha Manufahi 71.
Iha fatin hanesan Administradór Munisípiu Manufahi, Arante Izac Sarmento hatutan hanesan servidór povu iha munisípiu Manufahi rasik sente kontente ho Prezidente Repúblika, Dr. Francisco Guterres Lu Olo’ ho espoza ninia vizita, hodi halo diálogu ho komunidade sira, tanba Xefe Estadu bele rona direita komunidade ninia halerik no preokupasaun ne’ebé durante ne’e sira sente hela.
“Ami kontente tanba ita hotu hatene, Prezidente Repúblika susar tebes bainhira atu ba hasoru direita, ha’u hanoin ho vizita Xefe Estadu nian, hanesan servidor povu ho mós povu iha munisípiu Manufahi sente kontente tebes tanba durante ne’e hein hela ita-nia Xefe Estadu mai iha Manufahi atu bele haree no rona direita kondisaun ne’ebé povu sira hasoru nomós povu bele rona mensajen furak ne’ebé Xefe Estadu sei hato’o,” nia espresa.