Reportajen David da Costa Gusmao
Prezidente Komisaun F, Noe Ximenes deklara, sira identifika ema ho defisiénsia lubuk ida iha munisípiu Viqueque ho Bobonaru la asesu ba edukasaun, ho ida ne’e husu Asosiasaun Defisiénsia Timor-Leste (ADTL) no organizasaun sira ne’ebé serbisu ba ema ho defisiénsia atu bele halo rejistu ba sira.
“Ema ho defisiénsia barak la asesu edukasaun ne’e iha minisípiu Viqueque, tuir mak Bobonaru, ami identifika ema lubuk ida ne’ebé ho situasaun defisiénsia, maibé to’o ohin loron sira seidauk rejistadu, ho ida ne’e husu ba ADTL no organizasaun sira hotu-hotu ne’ebé servisu ba ema ho defisiénsia atu bele koopera hodi bele rejista ou rekolla ita nia ema sira ne’e nia dadus”, dehan nia ba jornalista sira iha Salaun City 8 Has Laran Manleuana, tersa 30/11.
Iha fatin hanesan Diretór Ezekutivu Asosiasaun Defisiénsia Timor-Leste (ADTL), Cesario da Silva dehan, situasaun ema ho defisiénsia barak liu iha area remotas sira hasoru situasaun ida ne’e, liuliu eskluzaun husi partisipasaun iha moris públiku, barak liu komete husi inan aman sira.
Nia salienta nune’e mós inan-aman sira ne’ebé iha kapital Dili, rejista 3 mill itál ema ho defisiénsia, maibe ema ho defisiénsia hirak ne’e iha ne’ebé sira la hatene, tanba tuir situasaun ne’ebé sira akompaña katak, barak liu inan aman sira esklui tiha oan ho defisiénsia.
“Entaun ho situasaun sira hanesan ne’e ami hakarak apela, ba familia liliu inan-aman sira atu para ona, ho esklui ema ho defisiénsia iha ita nia komunidade ho sosiedade”, nia deklara.
Nia haktuir situasaun ida ne’e la’ós ema ho defisiénsia nia hakarak mak atu sai hanesan ne’e, inan ho aman mos la’ós hakarak nia oan atu sai hanesan ne’e, tanba ne’e tenke asegura oportunidade ba sira, atu hola parte iha atividade hotu ne’ebé maka konsidera ema hotu bele hola parte ba, liliu iha moris públiku nia laran.
Nia dehan tuir dadus ne’ebé iha, ema ho difisiensia hamutuk rihun 38.118 iha Timor-Leste no numeru boot liu husi minisípiu Ermera purvolta 4 mill itál, tuir munisípiu Baucau ho Viqueque inklui Dili.