Reportajen Silvino Freitas
Komisaun Nasional Timor-Leste ba UNESCO, komemora loron mundial siensia no matemátika ba paz no dezenvolvimento ho tema “Harii Komunidade ne’ebé Prontu Hodi Hasoru Mudansa Klimatika”.
Ba jornalista sira Diretór Ezekutivu Komisaun Nasionál Timor-Leste ba UNESCO, Francisco Barreto dehan, siénsia no matemátika mak sai importansia hodi harí komunidade ne’ebé prontu no preparadu atu hasoru mudansa-klimátika ne’ebé dadaun ne’e afeta hela ba mundu.
“Siénsia no matemátika area ida ne’ebé mak importante, atu motiva ita nia estudante liu husi sira nia atividade pratika no estudu ne’ebé mak sira halo, atu nuné rezolve dezafiu ne’ebé mak mundu enfrenta hanesan mudansa-klimátika,” dehan Diretór Ezekutivu KNTLU, ba jornalista sira iha salaun Ian-Martins INFORDEPE Balide, Tersa 30/11.
Nia dehan buat hotu ne’ebé mak estudante sira aprende, tenke dezenvolve liu husi sira nia abilidade liga liu ba siénsia ne’ebé mak akontese, atu rezolve hasoru dezafiu global ne’ebé mak mundu enfrenta liu-liu mudansa klimátika.
Ho ida ne’e nia husu ba estudante sira, iha ensinu báziku no superior atu tau importánsia ba siénsia tanba daudaun ne’e planeta-terra enfrenta hela mudansa-klimátika, tanba liu husi siénsia mak bele rezolve no deskobre dezafiu hirak ne’e.
