Reportajen Joselina dos Santos
Diresaun Nasional ba Promasaun Dezenvolvimentu Média Lokal (DNPDML), iha Ministeriu ba Asuntu Parlamentár no Komunikasaun Sosial (MAPKOMS), liuhosi programa kooperasaun ho Plan Internasional Timor-Leste, fasilita Média Briefing ba média ho jornalista sira tema “Papél Média Iha Protesaun Labarik Iha Pre, Durante no Post Eleisaun” objetivu husi atividade ne’e atu eleva jornalista sira nia koiñesimentu oinsá atu fahe informasaun ba komunidade liu-liu ba Inan aman sira atu kontrola labarik sira iha tempu kampaña.
Ministru ba Asuntu Parlamentár no Komunikasaun Sosial (MAPKOMS), Francisco Martins da Costa Perreira Jerónimo hateten, média nia papél importante tebes atu rekolla informasaun ka hatun notísia no oinsá atu proteje labarik sira liuhosi edukasaun sivika ho maneira oin-oin husi média sira. Tanba entendimentu ema nian ba liberdade espresaun seidaukloos no ema hanoin katak buat hotu livre, maibé demokrasia ne’e mos iha limitasaun no regra atu kumpri.
“Antes kampaña ita ko’alia malu ho media sira atu halo prevensaun saida mak akontese iha eleisaun no informa ba publiku no partidus politiku sira atu kompete iha eleisaun parlamentar hodi kuidadau labarik sira, tanba laos tempu labarik sira hodi envolve atividade kampaña maibe sira nia tempu ne’e sei ba eskola no estuda. Nune’e husu inan aman sira durante iha kampaña kontrola labarik sira atu labele hetan risku, tanba iha tempu kampaña partidu politiku mobiliza ema ne’ebe to’o ona idade atu tuir kampaña laos lori labarik sira hodi envolve Kompaña”, Dehan MAPKOMS iha Salaun SEII Kaikoli, 14/04.
Iha fatin hanesan, Country Director Plan Internasional Fatima Soares Lala hateten, Plan Internasional hanesan organizasaun ne’ebé mai ho nia metas klaru kona-ba oinsa atu promove direitu labarik liu-liu igualdade ba labarik feto adolesente no foinsa’e sira. Programa ne’e nu’udar kontinuasaun husi kooperasaun ne’ebé asina memorandu entendimentu (MOU) husi MAPKOMS ho Plan Internasional (PITL), iha tinan kotuk hodi haree kona-ba oinsa mak atu promove liutan igualdade protesaun no Inkluzaun liuhosi media sira ne’ebe eziste no plataforma ne’ebé transmite ba Komunidade.
Nune’e mós Diretór DNPDML MAPKOMS José da Costa hatutan, Objetivu Breafing ba media ne’e atu kapasita no hasa’e koñesimentu jornalista sira nian, atu haree ba konteudu sira ne’ebe iha prosesu kampaña Eleitóral depois eleisaun, nune’e mós Liga ba prinsipiu igualdade jéneru kona-ba feto sira hodi garante liberdade no haktuir mos protesaun direitu labarik fó importansia proteje labarik sira iha eleisaun parlamentar.
