Reportajen David da Costa Gusmao
Ministeriu Agrikultura no Peskas (MAP), Ministeriu Saude (MS), parseira Programa Ai-han Mundial (WFP), Organizasaun Ai-han no Agrikultura Nasoens Unidas (FAO) no Organizasaun Mundial Saúde (WHO) lansa projeitu ba programa haforsa sistema ai-han nasionál, no implementa atividade redusaun risku dezastre naturais iha Timor-Leste.
Ministru Agrikultura no Peskas (MAP), Pedro Dos Reis dehan lansamentu ida ne’e hare’e liu ba iha programa Sistema ai-han iha Timor-Leste no mós haree liu ba iha poimove risku Dezastre naturais ne’ebé maka akontes iha Timor.
“Ita hotu hatene katak depois dezastre naturais akontesi iha ita nia rai laran, implikasaun boot tebe-tebes ba iha MAP, i direita mos ba ita nia komunidade. Entaun ho projeitu ida ne’e mesmu kikoan, mais pelemenus bele tulun ona ka faselita ministru nia servisu hodi tulun ita nia komunidade ba iha futuru, liuliu ba iha sistema ai-han iha ita nia rai laran ho nutrisaun ne’ebelé di’ak,” Informa Ministeru Agrikultura no Peskas (MAP) Pedro Dos Reis, ba jornalista sira iha City 8 Manleu, Kinta 31/03.
Iha fatin hanesan Reprezentante Programa Ai-han Mundial (WFP) iha Timor-Leste, Dageng Liu, dehan liuhosi inisiativa mult-sektoral ida ne’e, WFP sei suporta hodi dezenvolve ferramentu previzaun krize ai-han ne’ebé sei utiliza durante implementasaun estratéjia nasionál ba planu redusaun risku dezastre, mitigasaun dezastre, no preparasaun.
Liuhosi projetu ida ne’e, WFP sei haforsa kapasidade atu dezenvolve sistema previzaun nasionál, hodi monitoriza estensaun krize ai-han. FAO sei fornese teknolojia no hala’o atividade kapasitasaun liu atu redús estragu sira durante halo koilleta. No WHO sei halo atividade prátika dieta saudavel liu husi programa edukasaun nutrisaun sensitivu no mudansa hahalok ba konsumidór sira, liu-liu ba inan isinrua no inan fó susu no labarik sira.
Fundus ODS konjuntu Nosoens Unidas nian kontribui Milaun 1 liuhosi ajénsia Programa Ai-han Mundial (WFP), Organizasaun Ai-han no Agrikultura Nasoens Unidas (FAO), no Organizasaun Mundial Saúde (WHO) hodi hoforsa sistema nasionál ai-han no promove atividade redusaun risku deszastre nasturais iha Timor-Leste.
Iha Parseiru dezenvolvimentu hamutuk 13 mak apoiu fundu konjuntu ODS ne’e ho , inklui Uniaun Europeia, Denmark, Alemaña, Irlandia, Luxemburgo, Monaco, Norwégia, Portugál, Repúblika Korea, España, Swédia, Suísa, no Olanda.
