Reportajen Santina Lucia da Costa
Santo Papa Francisco félisita Prezidente Repúblika no povu Timor-Leste ba komemorasaun loron Proklamasaun Independénsia 28 Novembru 2021 ba dala-46.
Liuhusi karta ne’ebé hakerek ba Prezidente Repúblika iha 28 Novembru 2021, iha sidade Vatikanu, Amu Papa Francisco hato’o félisitasaun cordials ho votu krexente armonia no kooperasaun ho kbiit moris nian, dezeja futuru ida hakmatek no ksolok ba Timoroan.
“Ba okaziaun loron Timor-Leste nian, ha’u aprezenta ba Señór Prezidente no Povu felisitasoins cordias ho votus kresente harmonia no kooperasaun ho kbiit moris nian, dezeja futuru ida hakmatek no ksolok ba Timoroan hotu-hotu bele hetan protesaun as babeibeik.” Hateten Komunikadu Imprensa ne’ebé Neon Metin.info asesu iha Palásiu Prezidensiál Nicolau Lobato, Bairu-Pite, loron, 1/12.
Santo Papa iha fulan Juñu 2021 konfirma nia intensaun atu vizita Timor-Leste, hato’o liuhusi nia reprezentante Santa Sé iha Timor-Leste, Monseñor Marco Sprizzi, bainhira halo audiénsia ho Prezidente Repúblika.
Santo Padre nia vizita mai Timor-Leste depende ba evolusaun pandemia Covid-19. Tanba ne’e, ba seguransa ema hotu ninian, Amu Papa husu ba sidadaun ida-idak simu vasina, atu hotu-hotu protejidu bainhira hala’o vizita ne’e mai Timor-Leste.
Vizita dahuluk Santo Padre nian mai Timor-Leste akontese iha 12 Outubru 1989 iha tempu okupasaun Indonézia. Estadu, igreja katòlika no sarani tomak halo esforsu hotu-hotu, atu iha vizita husi Santo Padre Francisco mai Timor-Leste ida ne’ebé ukun rasik-an ona. Iha tinan-2015, Governu Timor-Leste asina Konkordata ho Vatikanu.