Reportajen David da Costa Gusmao
Komunidade uma kain hamutuk 63 iha suku Uaitame, Postu Administrativu Quelicai, Munisipiu Baucau seidauk asesu ba liña eletrisidade dezde Timor-Leste ukun an.
Bainhira jornalista Neon Metin kontaktu via telefone ba autoridade lokál Suku Uaitame, João Ximenes Moreira hateten iha suku Uaitame ne’e komunidade maioria mak asesu ona eletrisidade, maibé iha uma kain 63 mak sei iha hela nakukun laran, no seidauk asesu ba iha eletrisidade dezde Timor ukun-an.
“Iha hau nia suku maioria mak asesu ona eletrisidade, maibé iha uma kain 63 mak sei iha hela nakukun laran no seidauk asesu ba iha liña eletrisidade, ne’ebé ita esforsu hela, maibe ita nia kondisaun governasaun mak hanesan ne’e hela, ita la hatene los bainhira mak sira bele atende hela povu nia nesesidade sira hanesan ne’e,” dehan Autoridade Lokál Suku Uaitame ba jornalista Neon Netin liu hosi via telefone, Segunda 6/12.
Nia haktuir nu’udar autoridade lokál no reprezentante povu nian iha baze sei esforsu makaas atu komunidade sira ne’ebé la asesu ba liña eletrisidade ne’e bele asesu hotu eletrisidade. Konaba komunidade ne’ebe la asesu eletrisidade, halo ona proposta ba iha EDTL maibe to’o agora seidauk iha informasaun ida.
Nia sujere ba parte relevante sira atu tau atensaun ba problema sira ne’ebé mak komunidade hasoru iha baze, liu-liu iha suku Uaitame atu nune’e povu sira bele sente katak ukun-an ida ne’e iha duni nia folin ba sira. Nune’e mós ba parte relevante sira tenke haree ba problema sira ne’e, hodi bele responde ba komunidade sira nia prekupasaun.
“Hau nu’udar reprezentativu Povu nian iha baze nafatin hato’o ba iha governu atu tau atensaun ba problema sira ne’ebé mak povu hasoru iha baze hanesan eletrisodade, bee moos, saude, edukasaun atu nune’e povu bele sente katak ukun-an ida ne’e iha duni folin ba ita nia povu iha nasaun ida ne’e,” nia dehan.
Iha Suku Uaitame iha aldeia haat mak hanesan aldeia Caranu, Gamana, Gugulai, no Sialimo ho totál populasaun hamutuk 2,841, no uma kain hamutuk 431. Suku Uaitame ne’e pretense iha Postu Administrativu Quelicai no munisípiu Baucau.