Home EduTek Formasaun Letra Braille Ba Ema Ho Defisiénsia, Hodi Hasae Partisipasaun Iha Eleisaun

Formasaun Letra Braille Ba Ema Ho Defisiénsia, Hodi Hasae Partisipasaun Iha Eleisaun

111
0
AHDMTL ho UNDP iha formasaun. [Foto: Copyright UNDP | 06.12.2021]

Reportajen Umbelina dos Reis

Programa Dezenvolvimentu Nasoens Unidas (UNDP),  hetan apoiu husi Governu Japaun, no kolabora hamutuk ho  Asosiasaun Halibur Defisiénsia Matan Timor Leste (AHDMTL) hala’o formasaun letra Braille iha Munisípiu tolu, ho total ema ho difisiénsia (EhD) matan 120, hodi hasa’e sira nia partisipasaun iha eleisaun ne’ebé tuir mai.

“Atu labele husik ema ida iha-kotuk, ida ne’e nudar prinsipiu universal ba Ajenda Dezenvolvementu Sustentavel 2030, ho ninia intensaun atu reduz dezigualidade no vulnerabilidade ne’ebe mak hatun ema ida-idak ni-nia potensiál. Liu husi Projeitu UNDP Covid-Resilient, ita promove inkluzaun husi grupu sira ne’ebé ladun iha reprezentasaun hanesan feto, joven no ema ho difisiensia sira nune’e bele hasa’e sira nia partisipasaun iha eleisaun sira no asesu ba prosesu demokrasia,” hatete Munkhtuya Altangerel.

Iha fatin hanesan Diretór AHDMTL, Gaspar Afonso hateten treinamentu ida ne’e important ba ema ho defisiénsia sira, hodi partisipa iha eleisaun sira ne’ebé sei mai.

“Formasaun ida ne’e fasilita partisipante sira nune’e bele hola parte iha eleisaun sira ne’ebe mak sei mai, maibe edukasaun inkluzivu ida ne’e mos kapasita sira ho matenek ne’ebe mak sira bele hanorin fali sira nia maluk defisiénsia matan sira iha formasaun sira tuir mai”, dehan Gaspar, iha loron 06/12

Entretantu Kazumi Yamada, Counselor husi Embaixada Japaun iha Timor-Leste, hateten, “eleisaun livre no justu katak votande elijivel ne’ebe mak inkluzivu ne’e hanesan xavi ba demokrasia. Ami haksolok tamba formasaun letra braille ne’e halao ho susesu husi projeitu UNDP COVID Resilient Elections iha Timor – Leste ne’ebe mak apoiu ho orsamentu husi governu Japaun no implementa husi UNDP. Ida ne’e sei bele kontribui ba eleisaun sira iha Timor-Leste ne’ebe mak inkluzivu liu- tan laos deit iha situasaun covid nia laran maibe mos ba eleisaun sira tuir mai”, hatete Kazumi liuhusi Komunikadu Imprensa ne’ebé Neon Metin asesu, segunda, 06/12.

Formasaun Letra Braille ne’e nia durasaun semana rua no implementa husi projetu UNDP COVID-Resilient Elections (CORE-TL), ne’ebé suporta Timor-Leste, atu hala’o eleisaun ne’ebé mak reziliente ba COVID, informative no inkluzivu iha nivel nasionál no municipal.

Ema nain 120 husi munisípiu sira halibur hamutuk iha Aileu, Lautein, no Manufahi atu hasa’e sira nia kapasidade kona ba Letra Braille, nune’e mós asesu informasaun sira kona ba eleisaun no meius sira oinsá prevene COVID-19.

Eventu hala’o iha Hotel Timor ne’ebe mak partisipa husi UNDP, AHDMTL, no Embaxada Japaun iha Timor-Leste.

Print Friendly, PDF & Email

LEAVE A REPLY

Please enter your comment!
Please enter your name here