Reportajen Joanina Casemiro
Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso kondena makaas ho membru Parlamentu Nasional deputada KHUNTO, Olinda Guterres ne’ebe ko’alia la utiliza lingua tuir termus no dignu ba ema ho defisiénsia sira.
Liu husi konferénsia imprensa Diretór Ezekutivu AHDMTL, Gaspar Afonso husu deputada Olinda Guterres atu hasai statement ruma tenke tetu no analiza tanba terminolojia ne’ebé los, konsagra ona iha Konstituisaun RDTL artigu 21 mensiona katak sidadaun ho defisiénsia, laos sidadaun matan delek.
“Hanesan reprezentante povu iha uma Fukun Parlamentu Nasionál, tenke respeitu ema seluk nia direitu no labele hasai linguajen ne’ebé mak ofende ami nia fuan no dignidade. Ami hanesan organizasaun ba ema ho defisiénsia matan, lamenta teb-tebes ho ita nia statement ne’ebe mak fo sai ona iha loron hirak liu ba, ami la kestiona ho Armanda Berta nia kandidatura, maibe ami lamenta de’it ho ita nia komparasaun,” dehan Direitor Ezekutivu AHDMTL ba jornalista sira iha Salaun Konferénsia FONGTIL Kaikoli, 29/07.
Nia dehan hanesan organizasaun ema ho defisiénsia matan, ukun ne’e la’os ho fiziku maibé ukun ne’e ho kapasidade no koñesimentu. Tanba ne’e atu utiliza ga fo sai statementu ruma reprezentante povu nian, tenke hatene adopta ga asina tratadu International lubuk ida.
Gaspar husu ba deputada Olinda Guturres no nia asesór sira, ne’ebé serbisu iha bankada refere, la bele toba dukur de’it, kuandu halo statementu ruma tenke fó hanoin ba sira nia lideransa sira, liu-liu ba sira 65 iha uma fukun Parlamentu Nasional atu utiliza termus ne’ebé dignu ba ema seluk.
“Ami Ema ho defisiénsia matan hamutuk 14.828 ne’e la’os ema oituan, total defisiénsia iha Timor-Leste ne’e 38.118, sidadaun ba rai ida ne’e, ami nia direitu konsagra ona iha Konstituisaun RDTL iha artigu 21 no mos artigu 16 iha ejensia polítika,” dehan Gaspar
Nia akresenta hanesan organizasaun ne’ebé luta ba direitu defisiénsia matan la metan tebes-tebes, maibé sira tauk de’it mak defisiénsia fiziku maibé ita bo’ot sira defisiénsia fuan, konsensia ne’e mak perigu liu atu lori los povu nia sortimentu ne’e atu ba ne’ebé.
