Home Notisia RENETIL: Arte Moris Halo Atividade Pozitivu, Merese Hetan Sosiedade Tomak nia Apoiu

RENETIL: Arte Moris Halo Atividade Pozitivu, Merese Hetan Sosiedade Tomak nia Apoiu

1998
0
Arte Moris halo enkontru ho RENETIL. [Foto: Santina | 08.07.2021]

Reportajen Santina Lucia da Costa

Relasiona ho desizaun governu hodi okupa edifísiu Arte Moris, sai fali fatin Konsellu Kombantentes Nasional (CCLN), Juventude sira hosi Arte Moris hasoru malu ho organizasaun Resistência Nacional dos Estudantes de Timor-Leste (RENETIL), hodi buka solusaun ruma, tanba RENETIL nu’udar membru Konsellu Kombatente Libertasaun Nasionál.

Hafoin enkontru ba Neon Metin, Sekretáriu Jeral RENETIL, Joaquim Fonseca “Russuo” hateten RENETIL iha interese hakarak hatene informasaun husi Arte Moris kona-ba sira nia situasaun, tanba RENETIL mós hola parte ba CCLN, ne’ebé hanesan membru CCLN, RENETIL hanesan komponente ida husi CCLN, hakarak hatene informasaun didi’ak, atu bele buka dalan oinsá internalmente iha Konsellu nia laran  bele ko’alia ho Prezidente no estrutura sira atu buka dalan ne’ebé di’ak liu.

“Ami mós haree importánsia husi Arte Moris nia serbisu, liuliu iha kontestu dezenvolvimentu juventude nian, tanba ita ko’alia juventude, durante tinan besik 20 resin ona maka Arte Moris halo ida ne’e, husi sira nia inisiativa rasik prepara espasu para juventude sira bele espresa sira nia-an, no hanesan poténsia artistiku nian,” hateten Sekretáriu Jerál RENETIL, Joaquim Fonseca “Russuo” iha Fundasaun Haburas, Farol, 08/07.

Sekretáriu Jerál dehan RENETIL hakarak hatene, buka dalan ne’ebé di’ak liu, atu nune’e bele garante katak fatin atu kontinua espresa sira nia-an, parte seluk mós hanesan kontribui ida ba CCLN ninia serbisu tanba organizasaun ida mós hola parte iha CCLN.

Russou hatutan importante fatin ba Arte Moris ho adekuadu no fatin ne’ebé apropriadu ba sira atu kontinua sira nia atividade, tanba agora sira sai husi ne’ebá fatin laiha, no joven lubuk ida mak sei lakon espasu atu espresa sira nia-an no lahatene sira sei ba ne’ebé, tanba agora ne’e ema hotu lamenta kona-ba kestaun kriminalidade no balun dehan joven sira la kriativu.

 “Joven lubuk ida iha sira nia inisiativa rasik hakarak halo buat ida pozitivu, hau hanoin sira merese hetan  sosiedade tomak nia apoiu. Hau fiar katak sei iha rezultadu tanba sira ne’e mos CCLN sira nia oan hotu, CCLN uluk preokupa oinsa mak liberta rai ne’e, espasu ba ema atu espresa sira nia-an,” afirma Russou.

Sekretariu Jeral RENETIL husu ba juventude Arte Moris labele sai dezesperadu, iha tinan besik 20 nia laran sira enfrenta difikuldade lubuk ida, sira kontinua mantein, difikuldade ida agora ne’e todan uitoan tanba fatin ida ne’ebé sira susar atu hetan fatin lalais, se karik tenke sai husi fatin ne’ebá, maibé sira tenke sente pozitivu, tanba sira mós kontribui ona ba sosiedade ida ne’e, dezenvolvimentu arte kultura sira mos hola parte. Tenke fiar katak, Kombatentes veteranu sira ne’e, sira nia aman, sira nia aliadus bele halo diálogu ho sira.

Iha fatin hanesan Diretor Arte Moris, Iliwatu Danabere hateten enkontru ho RENETIL para atu hetan advokasia ruma, tanba RENETIL nu’udar membru ba CCLN bele influensia ho ninia pozisaun hodi buka solusaun.

“RENETIL mos parte husi CCLN, ami hakarak para RENETIL nu’udar membru ba CCLN bele influensia ho ninia pozisaun hodi buka solusaun ba ami nia situasaun, hasoru malu ho RENETIL Ami koopera hamutuk di’ak, laos rezultadu ona maibé ami kontenti apresisaun, protidaun husi estrutura RENETIL nian atu advokasia ba ami nia situasaun ida ne’e.” hateten Iliwatu Danabere.

Iliwatu dehan daudaun ne’e atividade iha Arte Moris lao nafatin, situasaun ne’e akontese maibé ladun hakfodak ba ida ne’e,  aula kontinua lao nafatin hanesan baibain.

“Agora dadaun ami sente hanesan nakukun uitoan, ami triste tanba ema ladún haree ami nia ezisténsia durante ne’e, liuliu ba órgaun ezekutivu sira tanba desizaun atribui ami nia fatin ba CCLN sem konsulta ka konsiderasaun mai ami nia ezisténsia durante ne’e,” akresenta Iliwatu.

Nia haktuir, Diresaun Nasionál Terras no Propriedade indika armajen Bebora, maibé la favoravél atu kontinua  atividade ne’ebé ami rejeita, ne’ebé dadaun ne’e fatin ba ami seidauk fiksu.

Print Friendly, PDF & Email

LEAVE A REPLY

Please enter your comment!
Please enter your name here