Reportajen Umbelina dos Reis
Forum Organizasaun Naun-Governamental Timor-Leste (FONGTIL) hamutuk ho Rede Ba Saúde iha Timor-Leste (REBASTL) halo selebrasaun da-huluk ba REBAS iha Timor-Leste nia ezisténsia, no FONGTIL fó apresia ba REBAS ne’ebé fó espasu no halo diálogu entre governu no ajénsia internasional, no organizasaun sosiedade sivil no parseria iha Timor-Leste ho entidade hotu hodi hala’o knaar ba empoderamentu komunidade no kontrolu sosial.
Diretór Ezekutivu FONGTIL, Valentim Da Costa Pinto liu hosi nia diskursu hateten, iha tinan kotuk REBAS ho inisiativa servisu ho parseria entre ONG ho governu, ne’ebé realiza estabelesimentu ba rede saúde Timor-Leste nian. Ohin selebrasaun dahuluk rede ba saúde iha Timor-Leste 2023 nian, ne’ebé kontinua promove no haforsa partisipasaun públika iha Timor-Leste.
“FONGTIL kontinua fó apresia ho inisiativa Rede ba Saúde iha Timor-Leste da-huluk nian, nu’udar espasu ida ke halo diálogu entre governu no ajénsia internasional sira. FONGTIL kontinua eziste nu’udar pilares hosi organizasaun sosiedade sívil iha Timor-Leste konsiente katak servisu parseria entre entidade hodi hala’o knaar empoderamentu komunidade liu hosi servisu advokasia hodi ajuda parseria ho prosesu dezenvolvimentu polítika iha públiku i kontinua autór ba kontrolu sosial,” hateten diretór ezekutivu FONGTIL Valentim Da Costa liu hosi nia diskursu iha Otél Timor, 05/05.
FONGTIL kontinua hatudu pozisaun boot ba governu, hodi kontribui no halo mudansa ba servisu saúde, no iha momentu pandemia Covid-19 nian. “Ita kontinua rekoñese katak sei iha dezafiu lubuk ne’ebé ezize sériu, no mellora espesífiku dezafiu ba mal-nutrisaun ne’ebé kontinua eziste iha rai, nune’e ita kolabora no servisu hamutuk hodi mellora iha fasildade bázika i Timor-Leste kontinua iha ameasas ba númeru mortalidade ba inan no bebe sira.” Nia dehan.
Nia hatutan, relasaun dinámika kontinua akontese iha ita nia rain liu-liu soe bebe, kombate Tuberkuloje, HIV-SIDA, oinsá hakbesik ba servisu saúde, kestaun ida ne’e oinsá mak define investimentu estratéjiku hodi bele tau atensaun ba aspetu prevensaun, oinsá reforsa ba destakamentu rekursu saúde nian.
Alein de ne’e nia mós alerta, oinsá mak halo jestaun ba ekipamentu ai-moruk ne’ebé públiku kontinua kestiona, oinsá mak ita nia klínika, ospital, sentru saúde kontinua iha ai-moruk hodi sustenta ba populasaun sira, nune’e rekomenda ba Ministru Saúde, oinsá mak bele kontinua servisu ba parte hotu-hotu.
Nia konklui, FONGTIL kontinua fó pose ba investimentu orsamentu jerál estadu nian hodi konsidera ba setór produtivu sira hanesan agrikultura, saúde, edukasaun. Nune’e ho opsaun osan ne’ebé mak naton ho esforsu ba atinjimentu báziku no nasional i tuir objetivu dezenvolvimentu sustentável.
Selebrasaun dahuluk ba Rede ba Saúde iha Timor-Leste ealiza tanba hetan apoiu hosi Estadus Unidus da Amérika no liu hosi ajensia USAID, no hamutuk ho Ministériu Saúde.
