Home Notisia Valentim Pinto: Timor-Leste Propoin Aprezentasaun Relatorio Chega! ba APF 2019 iha Bangkok

Valentim Pinto: Timor-Leste Propoin Aprezentasaun Relatorio Chega! ba APF 2019 iha Bangkok

151
0
Representante Sociedade Civil sira mak partisipa iha Enkontru Konsultasaun Regional ba APF 2019 (Foto: Faribel)

Xefe/Chair ASEAN Peoples’ Forum (APF) Timor-Leste propoin ba Komite Regional ba Programa APF 2019 nian atu fo opurtunidade ba Timor-Leste hodi halo aprezentasaun kona ba Relatoriu Chega! nian. Proposta ne’e hato’o iha Enkontru Konsultasaun Regional entre organizasaun sociedade civil, iha Bangkok, horiseik, 02/05.

Xefe/Chair APF Timor-Leste, Valentim da Costa Pinto, propoin aprezentasaun ida hosi Timor-Leste ba plenaria APF 2019, mak sei halao iha Bangkok, fulan Setembru tinan ida ne’e.

“Timor-Leste propoin ona aprezentasaun ida kona ba violasaun dereitus humanus mak akontese iha pasadu ba APF 2019 nian. Aprezentasaun ne’e iha relasaun forte ho tema APF nian no mos situasaun dereitus umanus iha rejiaun ida ne’e. Ami sei husu ami nia organizasaun mak servisu iha area ne’e hodi aprezenta Relatoriu Chega! no ami fiar relatoriu ne’e iha relevansia ho luta dereitus umanus mak ita hotu halo dadaun, “Valentin hatete iha Enkontru Konsultasaun Regional Sosiedade Civil ASEAN nian, horiseik.

Ba proposta ida ne’e Komite Programa sei koalia hamutuk no lori ba Regional Steering Committee (RSC) hodi halo desizaun. Maibe sei husu atu parte sira mak iha interese atu hatama sira nia aplikasaun depois hein desizaun hosi RSC.

Xefe/Chair Asean Peoples’ Forum Timor-Leste mos aprezenta ba forum kona ba progresu servisu ba APF Timor-Leste halo ona, inklui eleisaun membru komite sira no mos partisipasaun sosiedade civil nian iha forum regional ASEAN nian no debates kona asuntu regional foin lalais ne’e.

APF 2019 sei halao iha Bangkok, no sei partisipa hosi ema 1,000, hosi organizasaun sosiedade civil iha rejiaun sudeste asiatiku. Agrupamentu asuntu ne’e sai topiku ba diskusaun sosiedade civil nian mak kona ba Dereitus Humanus, Demokrasia, no Asesu ba Justisa, Investementu no Poder Kompania sira nian, Traballu Dignu, Saude no Protesaun Sosial, Migrasaun, Trafiku no Refujiadus, Dame no Seguransa, Sustentabilidade Ekolojiku no Innovasaun no Teknolojia Foun.

ASEAN Peoples’ Forum mak plataforma rejional ida ne’ebe lori hamutuk organizasaun sosiedade civil, inklui organizasaun ema indigena sira, movimentu trabalhadores, no mos organizasaun advokasia sira mai hamutuk hodi halo avaliasaun ba ASEAN ninia dezenpennamentu, no propoin rekomendasaun hodi hadiak dezempennamentu ASEAN nian hodi serbii diak liutan ema iha rejiaun ida ne’e nia laran.

 

 

LEAVE A REPLY

Please enter your comment!
Please enter your name here