Home Analisa RDTL ho Juvita Tama ba Tinan 17, Esperansa La Metin

RDTL ho Juvita Tama ba Tinan 17, Esperansa La Metin

76
0
Hadiak Labarik Sira Nia Edukasaun (Foto: Josh Estey)

Fulan hirak liuba, fila hosi Gleno dadalia ho Juvita (laos naran loloos), iha merkadu kik oan ida, iha dalan besik tama ba Railako. Juvita moris iha fulan Marsu 2002, fulan ida antes Restaurasaun Independensia. Nia moris hosi inan-aman agrikultur, no Juvita nia familia nia moris depende ba saida mak sira produs hosi toos laran. Juvita ho nia inan-aman faan saida deit mak fo isin iha toos laran hanesan kafe, lakeru, modo tahan, hudi no mos aifuan sira seluk hodi sustenta sira nia moris. Sira mos laos familia veteranu ka familia heroi sira. Sira povo babain ne’ebe konsege hakat liu situasaun trajiku okupasaun Indonesia no mos tinan 1999 nian.

Konstituisaun RDTL halo Juvita goza duni nia moris tanba nia bele hetan opurtunidade ba eskola ho gratuita. Oras ne’e dadaun Juvita tama ona kelas 3 SMA iha Gleno. Eskola mos la selu no nia ho nia kolega sira bele hetan hahan hosi programa merenda eskolar. Maski dala ruma programa ne’e para kleur mak hahu fali. Fulan hirak mai, Juvita sei halo hotu ninia eskola sekundaria. Bainhira husu nia kona ba saida mak nia hanoin bainhira nia eskola hotu? Juvita hatan dehan, “Hau ajuda deit apa ho ama iha toos. Ami nia ekonomia la forte hodi sustenta eskola bo’ot liutan.”

Se karik iha apoio ba eskola Juvita hanoin bele compete ho kolega sira seluk iha Dili? Atu hatan ba perguntas ida ne’e, Juvita pauza kleur tiha uituan. Hafoin nia dehan, “Ami nia eskola la hanesan ho Dili nian, Dili iha eskola ho qualidade. Hau nia kolega joven sira mos iha opurtunidade atu aprende buat oin-oin iha Dili. Karik hau sei esforsu maibe hau sente todan uituan.”

Juvita nia tinan hanesan mos ho tinan RDTL nian, tinan 17. Maski nia hela la dok hosi Dili, maibe ninia experiensia moris hatudu sinal importante ba idade RDTL ninian. Tinan 17 nia laran, Juvita moris ho situasaun kiak ne’ebe nia ho nia inan-aman hasoru, hamutuk ho nia alin nain 3 ho maun nain 1. Nia eskola iha eskola publik ne’ebe ninia qualidade dook tebes bainhira kompara ho eskola privadu sira, inklui fasilidade hijieniu no sanitariu, qualidade professor/a, metodu hanorin, fasilidade, no mos kondisaun fiziku eskola rasik. Maski nune’e, Juvita la iha opsaun seluk, nia uza duni opurtunidade mak iha, ho limitasaun oin-oin, hodi aprende. Se lae, Juvita bele tama ba kategoria analfabetu, ne’ebe mak ninia taxa kuaze 37% hosi total joven rural ho tinan 15 – 24, tuir dadus UNICEF nian. Juvita nia inan aman, tama ba kategoria ema Timor-Leste mak moris kiak, ho taxa 42% hosi total populasaun.

Sorte tebes, tanba Juvita nia inan-aman hakarak nia ba eskola. Nia tama iha kategoria joven rural ho taxa 6.4% mak sei kontinua eskola. Joven sira ho idade hanesan Juvita, ne’ebe mak sira nia inan-aman laos agrikultur iha 70% mak kontinua eskola. Joven feto barak iha area rural la dun hetan sorte hanesan Juvita tanba sira nia inan-aman ladun apoio sira hodi bele eskola.

Bainhira halo hotu Juvita nia estudu iha eskola sekundaria, nia sei la kontinua nia eskola ba nivel universitariu. Nia hanoin tiha ona atu ajuda nia inan-aman, maibe mos karik se iha opurtunidade, nia sei tuir formasaun ruma mak besik ba nia hela fatin. Bainhira husu ida ne’e ba Juvita, nia hatan deit dehan sei tuir bainhira iha formasaun mak besik ba nia hela fatin.

Iha area urbana no rural nian, laos joven hotu-hotu, ne’ebe ho idade hanesan ho Juvita ka bot liu uituan hakarak tuir formasaun ruma ka kontinua sira nia estudu. Dadus Sensus 2015 nian hatudu katak joven sira mak la eskola, la iha servisu, no la tuir formasaun ruma iha 20.3 pursentu. Hosi total pursentajen ne’e pursentajen ba feto a’as liu (23.7%) duke mane (16.8%).

Ho situasaun kiak mak Juvita hasoru, nia haree ninia futuru nakonu ho perguntas bo’ot. Bainhira husu perguntas kona ba oinsa ninia esperansa iha future mai, Juvita hatan deit ho liafuan, “Hau la hatene”. Liafuan ida mak bele esplika buat barak kona ba moris kiak mak Juvita ho nia familia hasoru. Nia inan-aman produs no faan sasan hosi sira nia toos durante tinan 17 ona. Sasan ne’ebe sira fan mak hanesan nafatin, no ho numeru ne’ebe dala ruma barak liu, dala ruma mos menus liu. Familia barak mak moris iha situasaun hanesan iha tinan 17 nia laran. Tanba moris kleur ona ho situasaun hanesan, dala ruma sira la hatene, ka hanoin katak situasaun mak hanesan ne’e nafatin ba tinan barak tuir mai.

Se karik Juvita hatene kona kadoras Greater Sunrise ne’ebe ema barak temi sei lori lukru bot mak RDTL, nia sei hatan oin seluk bainhira husu kona ba ninia esperansa moris. Maibe se karik Juvita hatene ho diak duni, bainhira haree ninia qualidade edukasaun, karik nia ladun iha esperansa bo’ot tanba opurtunidade ekonomia diak sei asesivel liu ba sira ne’ebe iha edukasaun diak liu.

Bainhira kompara idade Juvita nian ho idade Restaurasaun RDTL entaun sira nain rua iha idade ida hanesan, tinan 17. Iha kultura malae (occidental) nian, idade ida ne’e mak tama iha kategora nudar idade labarik joven, no idade joven adultu. Maibe Juvita nia moris hahu antes nia moris, hosi nia inan no aman. Hanesan mos ho RDTL, nia moris antes Restaurasaun, no ema sira mak hahoris no hakiak RDTL iha inisiu ne’e balun sei iha, asisti hela no diriji hela RDTL nia moris.

RDTL iha responsabilidade bo’ot ba Juvita no mos ba ninia maluk feto no mane sira hodi muda resposta “hau la hatene”, sai “hau hatene”. Laos deit hatene ninia esperansa maibe hatene atu halo saida, no hetan apoio saida hosi RDTL, hodi hakonu esperansa ne’ebe Juvita ho ninia maluk joven feto no mane sira iha.

LEAVE A REPLY

Please enter your comment!
Please enter your name here