Reportajen Santina Lucia da Costa
Komité 12 Novembru no jerasaun Komité 12 Novembru, hato’o sentidu kondolénsias ba saudozu Max Stahl.
Iha seremonia ne’e Prezidente Komité 12 Novembru, Gregório Saldanha ‘Mouris’ hateten, tanba Max Stahl nia luta, sakrifísiu, brani, matenek hamutuk ho Loriku As’wain sira iha 12 Novembru, transforma bee turuk ida iha laloran boot, baku to’o Jakarta, nune’e Timor-Leste ohin loron Independente.
Prezidente Komité 12 Novembru hato’o sentidu kondolénsias ne’e, bainhira Urna Max Stahl halo konvoi tranzlasaun iha sidade Dili, edifisiu Komité 12 Novembru iha Balide, Dili.
“Lori Komité 12 Novembru nia naran ho oan jerasaun 12 Novembru, Komité Ezekutivu, Centro Nasional Chega! Asosiasaun Vítima, ASEPOL, hakarak hato’o kondelensia ba Saudozu Max Stahl nia espoza ho Familia sira hotu liuliu oan ki’ak sira, tanba Max Stahl husik ita hotu.” Hateten, Prezidente Komite 12 Novembru, Grigorio Saldanha, Kuarta-Feira, 15/12.
Gregoriu agradese ba Max Stahl nia luta sakrifísiu, brani matenek, hamutuk ho loriku As’wain sira iha 12 Novembru, transforma bee turuk ida iha laloran boot baku to’o Jakarta no Mundu Internasional, ohin loron Timor-Leste independente.
“Hakarak agradese fó obrigadu barak ba Max Stahl, tanba nia luta no sakrifisiu, ninia brani, matenek, halo antes 12 Novembru no depois 12 Novembru iha funu laran depois funu hotu to’o ohin loron, ami hakarak hato’o obrigadu boot teb-tebes ba Max Stahl ba luta ida ne’e espesialmente hamutuk ho loriku as’uain sira iha 12 Novembru transforma bee turuk ida iha laloran boot ne’ebé baku to’o Jakarta iha Timor-Leste ohin loron Independente.” Dehan Gregorio Saldanha.