Reportajen Calisto dos Santos Oqui
Ministru Ensinu Superior Siénsia no Kultura ensera loron komemorasaun loron mundiál siénsia ba paz no dezenvolvimentu no loron nasional ensinu superior nian.
Iha enserramentu ne’e Ministru Ensinu Superior Siensia no Kultura (MESSK), Longuinho do Santos hato’o nia parabéns ba atividade ne’ebe universitáriu sira organiza.
“Ohin loron sai onra boot mai ha’u, nu’udar Ministru Ensinu Superiór, Siénsia no Kultura, hodi partisipa iha serimónia ida ne’e, ne’ebé atu hala’o enseramentu ba atividade sira ne’ebé hala’o ona iha fulan-Novembru, bainhira ita selebra loron Siénsia ba Pás no Dezenvolvimentu, no mós Loron ba Ensinu Superiór nian”
Atividade hirak ne’e rasik organiza hetan partisipasaun di’ak no susesu. Tanba ne’e hein katak, iha tinan sira tuirmai, atividade selebrasaun siénsia no ensinu superiór nian sei kontinua ho susesu liután, iha meiu akadémiku no sientífiku iha sosiedade timoroan nian em-jerál.
“Ha’u hakarak salienta liután katak kona-ba tema ne’ebé hili ona ba atividade sira fulan-novembru nian pertinente te.bes, hanesan: “Melloria kualidade ensinu superiór timoroan nian iha era pandemia COVID-19”. Ha’u fiar katak sei la iha tema ne’ebé adekuadu liu ba situasaun ne’ebé ita hasoru daudauk”.
Durante dékada rua nia laran, ensinu superiór buras lalais tebes, hodi fó resposta ba ita-nia joven sira nia vontade, atu asesu ba koñesimentu no formasaun.
Iha fatin hanesan Prezidente Komisaun Organizadora, Maria Filomena Lay hateten MESSK harii iha tinan 2018, kada tinan sempre selebra loron nasionál ensinu superior, ne’ebe monu iha loron 17 Novembru, nune’e ba tinan ida ne’e, tanba iha situasaun COVID-19, fo impaktu boot ba partisipasaun no atividade sira, nune’ebe halao deit atividade iha diresaun Ministériu Ensinu Superior konaba diskursu publiku no eskrita kreativa ba dosente sira
Objetivu loron ohin atu ema hotu refleta katak ensinu superior sai hanesan pontu kulminante ba jovem ida no ba kualker ema ida ne’ebe hakarak eskola iha ensinu superior, ho ida ne’e ita hotu hanoin katak ensinu superior loron ida, selebra no refleta ba loron ensino superior nian tinan-tinan iha rai laran.